كود هند لكلاوي ///
البارح السبت، كان يوم استثنائي في الرباط، كان اجتماع الأممية الاشتراكية في العالم، ولي كتضم أحزاب كبيرة على المستوى الدولي، منها أحزاب لي كترأس حكومات في دول متقدمة بحال إسبانيا، ومنها أحزاب كتمثل المعارضة الأولى.
الاجتماع، كان فيه رؤساء حكومات، ووزراء، ووزراء سابقين، وزعماء فرق معارضة في بلدانهم وقيادات تحرر ومناضلين حقوقيين وشخصيات معروفة في الإعلام الدولي لي كيهتم بالسياسة والحركات الاجتماعية والحقوقية .
بيدروا سانشيز رئيس الوزراء ديال إسبانيا ورئيس الحزب العمالي الاشتراكي الإسباني، هو الرئيس الحالي ديال الأممية الاشتراكية، هاد السيد لي هو صديق المغرب وصديق حزب الاتحاد الاشتراكي للقوات الشعبية، وصل لمطار الرباط البارح السبت في الصباح بكري ( حوالي الساعة السابعة والنصف)، وفي طائرة عادية ( لوكوست) وكان معه وفد مهم من الحزب ديالو لي هو الحزب الحاكم في إسبانيا.
فاش نزل، ماكان حتى شي استقبال رسمي ليه.
حنا في كود، جاتنا القضية فشي شكل، أواااه، واش كاين شي أزمة دبلوماسية صامتة بين المغرب وإسبانيا، الله ياربي.
وحيت حنا مكنتسرعوش، ومكنقلبوش على البوز الخاوي، درنا اتصالاتنا، وقصدنا موالين الدار، لي هوما حزب الاتحاد الاشتراكي، لي هو محتضن هاد الدورة.
والجواب لي عطاونا، هو نفسو لي زكاتو مصادر أخرى رسمية.
هو أن هادشي كان برغبة من الاتحاد الاشتراكي، وباتفاق مع بيدرو سانشيز رئيس الحزب العمالي الاشتراكي، والأممية الاشتراكية واللي هو حاضر للمغرب بهذه الصفة.. وخا كان هناك من يتساءل علاش لم يكن له أي استقبال رسمي أو تعامل خاص جدا ..
الجواب كان أيضا، الهدف، هو يبقى الاجتماع في صبغته الحزبية السياسية، كاجتماع ديال أحزاب تنتمي لمنظمة الأممية الاشتراكية.
الجميل في تعامل قادة الأحزاب الاشتراكية المنتمية للأممية الاشتراكية هو رفضهم الكامل لأي بروتوكول، حتى من هو منهم رئيس حكومة أو وزير أو قائد حزب.
شفنا خلال أشغال الأممية الاشتراكية كيفاش بيدرو سانشيز جا من المطار فسيارة عادية وكان فاستقبالو مناضلين من لجنة العلاقات الخارجية للحزب..
من المطار، مشا هو ووفد الحزب العمالي الاشتراكي الإسباني ف سيارات خاصة وعادية لمناضلين في الاتحاد الاشتراكي.. مباشرة لفندق سوفيتيل، فين كان الاجتماع.
ولي كيزكي هادشي، هو أن بيدرو سانشيز كان جد مرتاح. وناشط ولا يخفي ذلك وهو يسلم على كل من التقاه وطلب يسلم عليه حتى داخل مطار الرباط – سلا ..
عطا تصريحات للصحافة المغربية ووكالات أجنبية في الأوتيل ولم يتردد يتجاوب مع كل من طلب منه تصريحا، وكانت تصريحاتو إيجابية ومتفائلة، وقال بلي هو فرحان بأن هاد الاجتماع تعقد في المغرب.
ومن مصادرنا الموثوقة، أنه في لحظة انشراح، شكر بيدروسانشيز قيادة الاتحاد الاشتراكي وقال أنهوم رفعو البارا على كل الأحزاب لي غتبغي تحتضن الاجتماع مستقبلا، خصوصا على مستوى التنظيم والكرم المغربي. وبلي هاد الاجتماع اجتماع جيد جدا من حيث التنظيم واللوجيستيك والسلاسة والنقاشات.
وشفنا كيفاش كان بيدرو مكيرفضش يتصور مع أي واحد طلب منو صورة، وطبعا كان في عدد من المرات هو اللي تياخد الهاتف باش يدير السلفي مع اللي طلب أو طلبات الصورة. ودائما بنفس الابتسامة اللي هي تحية الكمراد. بيدرو سانشيز.
بيدرو سانشيز، عندو ذاكرة رهيبة، بحيث فاش كيجي أي وفد يسلم عليه، كيفاجئهوم أنه عارف أسماءهم، وعارف بدقة المشكل المطروح في البلد ديال ديك الحزب.
بيدرو سانشيز غيغادر المغرب مع الرابعة، بنفس الطريقة لي جا بها: الدق والسكات وفي طائرة عادية ( لاكوست).
هادشي أكداتو الوفود الدولية كلها، عمدة باريس ولي تتواجد على رأس احد اكبر وأهم العواصم الأوروبية حتى هي تم استقبالها فالمطار من طرف مناضلين اتحاديين وجات فسيارة عادية وفالعودة نفس الشيء وهذا كان تقريبا سلوك كل من حضروا أشغال الأممية الاشتراكية..
قادة أحزاب مهمة من فلندا وآسيا وأمريكا اللاتينية كلهم تصرفو بأريحية كبيرة وبتواضع ملفت، يمكن ساهم فيه الشعور بالأمان فبلد مستقر سياسيا ووسط حزب عندو خبرة وتقاليد كبيرة فاستقبال الوفود الأجنبية.
وهنا غنقولو/ برافو لادريس لشكر وباقي الاتحاديين.
حاجة اخرى عرفتها الأممية الاشتراكية للي نظمها الاتحاد الاشتراكي، رئيس الحزب الاشتراكي الفرنسي أوليفييه فور حسب مصادرنا تباحث في الكواليس مع قيادة الاتحاد الاشتراكي حول كيفية رجوع الاشتراكيين بقوة في الانتخابات المقبلة، وعبر على أنه معجب بتجربة الاتحاد الاشتراكي، حيت هو من الأحزاب الاشتراكية في دول الجنوب لي مضعافتش وبقات محافظة على تواجدها وعلى إرثها السياسي وأيضا مقراتها وإعلامها، ولي رغم الظروف الإقليمية، لي مكتلعبش لصالح الأحزاب الاشتراكية، إلا أنه باقي ضمن الأحزاب الأربعة الأولى مغربيا.
فهاد الاجتماع، كانوا الفلسطينيين والتونسيين، وكانت المعارضة التركية الأولى لأردوغان، كانو الاشتراكيين السوريين، وتفتح نقاش حول مستقبل المنطقة في ظل التغيرات لي واقعة في سوريا في اللقاءات الثنائية. وأيضاً كان دعم واضح من الجميع للقضية الفلسطينية والكل كان تيقول الحل هو بناء دولتين مستقلتين..
طبعا، الاتحاد الاشتراكي سجل بزاف ديال الأهداف في مرمى الدبلوماسية الموازية، وكرس نفسو الحزب رقم واحد في المغرب على هذا المستوى، وللأسف فالأحزاب الثلاثة المشكلة للأغلبية، ما عندها حتى حضور دولي، وحتى المنظمات الدولية لي هي عضو فيها، معندها فيها حتى تأثير.
المؤاخذة الوحيدة على الاتحاد الاشتراكي، هو مكيعرفش يستثمر هادشي إعلاميا، كيدير خدمة كبيرة على المستوى الخارجي، وهادشي مزيان، وكينفع البلاد، وخصوصا في قضية الصحراء، ولكن تقريبا بدون عائد كبير على الحزب انتخابيا وتسويقيا.
نقطة أخيرة، أنه رغم أن الاجتماع مر بهدوء، وبزاف ديال الناس في العاصمة الرباط، محسوش بأنه كاين تدابير أمنية استثنائية، فميمكنش نغفلو دور الدولة بتنسيق مع الحزب في إنجاح هاد الدورة.
غير أمن شخصيات وازنة دولية ماشي ساهل تدبرو بهاد السلاسة.
برافو الاتحاد الاشتراكي، برافو المغرب.
