هند لكلاوي مراكش ///

تصورو غرفة مهنية كدافع على السينما المغربية كتولي باغية تعاقب مخرج ويالله بدا. هاد الشي اللي دارتو الغرفة المغربية لمنتجي الافلام.

هاد التجمع المهني اللي كان عندو همة وشان قبل سنوات ولى تجمع للمصالح ضد الحريات مع التضييق والعقوبات. قاليك يا سيدي انها كتابع بقلق واهتمام تداعيات “ما بعد فيلم “الزنقة كونتاكت” لمخرجه اسماعيل العراقي. بغات توهم الملتقي باش كتبات “وما خلفه من إستياء لدى عموم مكونات الشعب المغربي عامة والمهتمين والمهنيين في مجال السينما على وجه الخصوص” شكون عطاكم الشرعية باش تهدرو باسم الشعب اولا وشكون عطاكم الشرعية باش تهدرو حتى باسم جميع المهنيين.

ما كيحشموش. هدرو باسم جمعيتكم وسكتو. من بعد كتبو باللي “مكونات الغرفة المغربية لمنتجي الأفلام٬ هما راه بيهم غير ناس قلال٬ “ما ترتب من إساءة عن الفيلم وتضمينه لمقطع يسئ ولا يضيف، بل لا طائل من إقحامه حتى فنيا كما يدعي القائمون عليه، فهو لا يتعدى كونه مجرد دس نقطة سم الأعداء في جرة عسل الوطن ولا فائدة ترجى من ورائه سوى المساس بثوابت الوحدة الترابية للمملكة”

دازو للهدرة لكبيرة ديال ثوابت الامة. يا اللي ما كيفهموش. راه الفنانة مريم حسن مغربية. المغرب كيعتابرها مغربية واخا مدافعة عن البوليساريو وعلى قيام دولة البوليساريو. اييه المغرب كيعتابرها مغربية. اش من توابث. اغنية. مقطع اغنية يمس التوابث.

الاخطر هو اللي جاي فالبيان. بغاو يشريوها للمخرج اسماعيل العراقي وكيهدرو على “المس بإستقرار أمن الوطن، ودون وعي منهم بأخلاقيات مزاولة مهنة السينما، والتي نعتبر قضية وحدتنا الترابية من أهم إهتماماتها كباقي كل الشعوب في العالم”.

وزادو باللي باغيين يبنهو. خدمة هادو هي انتاج افلام وفيهم مخرجين اعضاء يعني اخراج افلام. احسن ما يقدرو يديرو للوطن هو الجرأة فالتعامل سينمائيا مع قضايا بحال الصحرا. ديك الهدرة لكبيرة ديال الوعي بالمسؤولية واليقظة والانتباه راه غير تخربيق.
خدمتكم الافلام. بدعو الافلام. ديرو افلام مقادة يمكن يكون لكلامكم معنى.

انتوما درتو صحابكم فلجنة تحكيم اخر دورة وما ربحتوا والو ولقيتوها فرصة للانتقام من الفيلم الفائز بالجائزة الكبرى. ركزو على الابداع ونساو الشريان ولحفير لجيل جديد غادي يتجاوزكم. حشمو على عراضكم ودافعو على الحرية فكل تجلياتها. فالابداع فالمجتمع فالسياسة. انتوما خاصكم دافعو على حرية الاخر ماشي تقصيو اللي منكم ماشي حتى الاخر.

راه مول الفيلم خرج وقال غادي يحيد اللقطة للي فيها اسم الفنانة وموسيقاها. هي تخربيقة غبية من هاد المخرج ولكن دارها.