كود سبور//

فرگع الدولي المغربي ياسين بونو حوايج جديدة بخصوص الحادث اللي كان وقع فماتش المغرب والكونگو الديمقراطية ضمن منافسات كأس إفريقيا “الكوت ديفوار”، والصداع اللي ناض بين المغاربة والكونگوليين ملي سالا الماتش.

وكشف ياسين بونو فحوار مع “Colin terview”، على السبب اللي خلى المهاجم المغربي يوسف النصيري يتبع كابيتان الكونغو الديمقراطية سانشيل مبيمبا، اللي نوضها مع الناخب الوطني وليد الركراكي فالواقعة الشهيرة، وقال: “قاليا النصيري إن مبيمبا بقى الماتش كامل هو كيعاير فيا واخا ما دويتش معه وبلا سبب”.

وكمل ياسين بونو اللي تبع النصيري فالتيران وشدو باش ما يضاربش مع مبيمبا، وقال: “يوسف كان قريب من مبيمبا الماتش كامل حيث هو النصيري مهاجم ولاخور مدافع، وقاليا يوسف إن مبيمبا كان كيقول لصحابو اللاعبين يضربو عز الدين أوناحي ويوعتوه، داكشي علاش ناضت ملي سالا الماتش”.

للإشارة، راه الكونگولي سانشيل مبيمبا كيلعب مع المغربيين عز الدين أوناحي وأمين حارث فأولمبيك مارسليا الفرنسي.