گود سبور//

وجه ياسين بونو حارس مرمى المنتخب الوطني المغربي الشكر للجمهور فميريكان اللي جاو عندهم يشجعوهم، وواعد المغاربة يفرحوهم هو وصحابو فمونديال 2026.

وهضر ياسين بونو فتصريح نشراتو الجامعة الملكية المغربية لكرة القدم، وقال: “كانشكرو الجمهور اللي جا يشوفنا اليوم ويساندنا، وكانتمناو نقدمو مستوى كبير باش نفرحوهم”.

وبخصوص الأجواء داخل المنتخب وضح بونو وقال: “الدراري وصلو مزيان، وشويا بشويا كايولفو مع الديكالاج اللي كاين ولكن كلشي مزيان والدراري فرحانين وناشطين وهادي هي أهم حاجة”.

وكمل بونو وقال: “كاتحس انه كاين حلم باش تتحقق، شي حاجة كبيرة إنشاء الله، والهدف ديالنا هو ندوزو من الدور الأول، ومن نمشيو ماتش بماتش باش نديرو شي حاجة تاريخيّة”.

وأكد ياسين بونو: “حنا عارفين أن جمهورنا كاين فالعالم كامل والمغاربة ديما حاضرين وكاين اللي كايسافر وكاين اللي كايشجعنا من دارو، وحنا كانحسو بهذا السند، وكانتمنى نكونو بواحد المستوى كبير اللي يشرف بلادنا والمغاربة كاملين”.