أكد ياسين بونو الگول ديال المنتخب الوطني المغربي، أنه هو ولاعبين المنتخب المغربي حاسين بالمسؤولية اللي عليهم باش يكونو عند حسن ظن الجمهور، ووضح بلي المنتخب دابا فيه لاعبين عمرهم صغير بمستوى كبير وأنهم عندهم مستقبل زوين، ودابا ليكيب ناسيونال غنية باللاعبين.

وهضر ياسين بونو فتصريح للموقع الرسمي ديال الجامعة الملكية المغربية لكرة القدم وقال: “الاستقبال اللي دار لنا الجمهور هنا فأكادير كان استقبال كبير بحال ديما وماشي أول مرة كنلعبو هنا والماتش ضد أنگولا داز فمستوى كبير ودابا عندنا ماتش ثاني غنحاولو نديرو فيه مجهودنا كامل بحال ديما ونكملو فهاد الخط التصاعدي”.

وكمل ياسين بونو: “كنقول للجمهور يزيدو يساندو هاد اللاعبين كيفما كانو كيساندوهم ديما، وحنا كنحسو بالمسؤولية باش نعطيو لعشاق المنتخب المغربي داكشي اللي كيتسناو ويكون خير”.

وزاد وضح بونو: “معدل الأعمار فالمنتخب المغربي دابا صغير وهاد الدراري غيفوتونا حنا فالمستقبل وغيكونو لاعبين كبار وكثر من داكشي اللي داز من قبل، والكورة ديال اليوم كتعتمد بزاف على الشباب وما عندناش غير فريق واحد، راه عندنا 3 فرق واللاعبين اللي كاينين فمستوى كبير”.