أميمة عطية – كود كازا ///

قدرو لبوليس بمنطقة أمن الرحمة فالدار البيضاء، فالساعات الأولى من فجر هاد صباح الثلاثاء 29 شتنبر، يوقفو ثلاثة أشخاص كيتراوحو العمر ديالهم ما بين 21 و25 عام، للاشتباه فتورطهم فأعمال عنف مرتبطة بالشغب الرياضي.

وحسب المعطيات الأمنية لمتوفرة، لبوليس توصلو بإشعار على مجموعة ديال الأشخاص المحسوبين على للمشجعين، تسببو فخسائر مادية وهرسو طوموبيلات فشارع لعام ، وتعداو على مشجع من لفرقة لخصم بلعصا والضرب وشعلو لعافيا فمطور ديالو.

الأبحاث والتحريات اللي دارتها مصالح الأمن مكنت من تشخيص هويات المشتبه فيهم، وحجزو على مطور كان كيسهل عليهم هاد لعمليات ، ودابا غادي يخضعو للبحث القضائي تحت إشراف النيابة العامة المختصة، باش يتم الكشف على جميع ظروف وملابسات هاد الأفعال والخلفيات.