كود سبور//

كشفو البوليس ديال الصبليون على المعطيات الأولية بخصوص الكسيدا اللي مات فيها البرتغالي ديوگو جوتا نجم ليفربول النگليزي هو وخوه صباح اليوم الخميس.

وفبلاغ لهم وضحو البوليس ديال الصبليون، ان المعلومات الاولى حول الكسيدا، تشير إلى أن الطوموبيل من نوع لامبورگيني، خرجت من الطريق ديالها ملي تفرگعت له الرويضا وهي كاتدوبل طوموبيل اخرى.

وحسب البوليس الصبليوني، الكسيدا وقعت فالساعات الاولى من صباح اليوم الخميس، حوالي 00:30 بتوقيت گرينيتش، ففيلاج سيرناديلا بمقاطعة زامورا، وفالبلاصة شعلت العافيا فالطوموبيل وديوگو جوتا وخوه اللي كانو راكبين فالطوموبيل ماتو.

للإشارة فديوگو جوتا يالاه تزوج غير ايام هادي ودار العرس ديالو غير يوم 22 يونيو 2025، قبل ما يتوفى هو وخوه فالكسيدا اليوم الخميس عن عمر 28 عام.