كريم الصوفي – كود//
ذكرات تقارير إخبارية، أن بوليس الصبليون شدو مغربي وكولومبي ف سرقسطة بسباب التورط ديالهم فتزوير لوراق للحراگة ف اسبانيا، كما تم اعتقال 20 مهاجر تقريبا ف عملية نفذاتها وحدة تابعة لمكتب الهجرة بالشرطة الوطنية الاسبانية. هاذ الحراگة استافدو من تصاريح إقامة مزورة ف مقابل 500 يورو.
وأضافت التقارير ذاتها، أن هاذ الريزو الاجرامي كان كيوفر للحراگة جميع لوراق المطلوبة لتسوية الوضعية القانونية ديالهم فوق التراب الاسباني وحتى المهاجرين اللي مقيمين بشكل قانوني وباغين الوثائق ديال لم شمل الأسرة، كانت الشبكة كتكلف ليهم بجميع الاجراءات والوثائق المطلوبة.
المغربي ومراتو والكولومبي دابا متابعين ف حالة سراح مؤقت من جرائم “الانتماء إلى منظمة إجرامية ووثائق مزورة وتسهيل الهجرة غير الشرعية” والتحقيقات خدامة على مجموعة من الشركات اللي يشتبه ف تعاونها مع الريزو في توفير عقود عمل وشهادات عمل وباقي الوثائق الأخرى..
