علي الصافي كود العيون//

عبد الرحيم بوعيدة البرلماني عن حزب الاستقلال أي فالأغلبية، ممثل الأمة للي عندو المهام النيابية محددة فالقانون واللي كيأطرها طبعا ميثاق الأغلبية، تحول لمؤثر وصانع محتوى كيقلب على المشاهدات بلاصت مايمشي يدير خدمتو كنائب برلماني ويدير خدمة نقية بحالو بحال بعض النواب لي كيخدمو كثر ما يهضرو.

بوعيدة ناض دار فيديو على الزيادة فثمن البوطا، استعمل خطاب الشعبوية طبعا لأنه “غبي” في الاقتصاد ومقاريش الاقتصاد، كيقول بلي قرار الزيادة ممزيانش وزدنا 10 دراهم والبوطا ناقصا 3 كيلو فالوزن ديالها، هنا تيشك بلي شركات الغاز كيغشو المغاربة وكينقصو فالوزن ديال الغاز.

اتهام خطير خصو تحقيق. بوعيدة لي نسا بلي قرار رفع الدعم التدريجي كيعتبروه الخبراء الاقتصاديين إنجاز مهم لاقتصاد بلادنا، بل كاين لي مشا بعيد وصرح بلي خاص إلغاء المقاصة لأن فلوس الدعم كتمشي للشركات والأغنياء وماشي للدراوش، بلا ما نذكروك بلي الوزير المنتدب المكلف بالميزانية فوزي لقجع، قال فالبرلمان أنه ’’من 2015 إلى 2023 خصصت الدولة 111 مليار درهم لدعم غاز البوتان لم يستفد 20 في المئة من الفقراء إلا بـ2.5 مليار درهم سنويا، أي 14 في المئة من هذه الحصة، في حين استفاد 20 في المئة ممن لديهم الإمكانات من أكثر من 27 في المئة من هذا الدعم”. بل اكثر من هذا، ففي سنة 2022 صرفات الدولة على دعم البوطا ما يناهز 22 مليار درهم أي 6 في المائة من الميزانية العامة للبلاد.. رقم كبير وكيخلع.

يلا كنتي جاهل بهادشي مصيبة ويلا كنتي عارف وباغي دير البوز راها فضيحة. بوعيدة قال بلي هاد الحكومة توفرت ليها جميع الشروط، المعارضة كطبل ليها والإعلام كولو كيطبل ليها (هادي كذبة كبيرة.. شحال من قطاع حكومي كتنتقدو الصحافة، وشحال من قرارات كيتم انتقادها ..) وحتى المعارضة تنتقد.. هادي شعبوية ديال شي واحد كيعتبر راسو الوحيد لي كينتقد الحكومة. في حين ميقدرش ينتقد حتى مسؤولين فالصحراء. واحد السؤال كيطرح راسو على بوعيدة بخصوص البوليميك على البوطا، هو شنو لي كيمنعو أنه يشكل لجنة استطلاعية حول شركات تعبئة أسطوانات غاز البوتان المعد للاستهلاك المنزلي على ضوء قرار الحكومة الأخير بالزيادة في أثمان هاد المادة الحيوية ؟. عبد الرحيم بوعيدة كنائب برلماني كيعطي له الدستور والنظام الداخلي لمجلس النواب صلاحيات واختصاصات واسعة ومتعددة لمراقبة الحكومة وتقييم سياساتها العمومية، فلماذا لا يلجأ إليها ويفضل تصوير اللايفات وهو يتسلق شاحنات توزيع قنينات الغاز وإبراز منتوج واحد لشركة معينة بلون ليموني دون الحديث عن الشركات الأخرى. هل عبد الرحيم بوعيدة مقتنع بانتمائه للبرلمان والأغلبية ولحزب الاستقلال، أم هو يؤمن بالمقولة التي تقول: يأكل مع الذئب ويبكي مع السارح. بإمكان بوعيدة يدير خدمة نقية ويدير شكاية لوكيل الملك ..ماشي باش دير فيديو غير باش دير البوز وصافي.

هاد الموضة ديال السوشل الميديا لي فيها حلان الفم بزايد وبمعلومات مغلوطة غير مسنودة بأدلة قوية، وفيها اتهامات خايبا لأشخاص ذاتيين أو معنويين أو مسؤولين أو شركات.. خاص قانون ينظمها. موضة خايبا كتنشر بزاف ديال الفايك نيوز، حيث فيها جيم وفيها البطولة الزائفة. هاد بوعيدة كون كان فعلا كيدعي أنه كيحارب الفساد والريع، يهضر فقط على الريع لي فالصحراء، يهضر على هيمنة ولد الرشيد على الصحراء، يهضر على شبهات اختلاس أموال عمومية فعدد من الجماعات فالصحراء. ولكن ميقدرش. بوعيدة راه جزء من منظومة الريع فالصحراء أصلا، حيث لا نسا ممكن نفكروه فاش كان فمصر كيقرا وكيفاش كان كيستفد بطريقة غير قانونية من دعم شهري يقدر بـ500 دولار كمنحة، رغم أنه ما محسوب على مناطق الصحراء للي فيها هاد الامتياز. ومور الاحتجاجات ديال عدد من المغاربة قررت الدولة تحيدلو هاد المنحة لأنه لا يستحقها. المستوى المنحط علميا وثقافيا لهاد البرلماني، كيبان غير من مسارو العلمي، هذا كان قرا فجامعة عين شمس مع رياض فخري، لأنهم مقدروش على مستوى جامعة القاهرة لي طالع. وطبعا عادي يجيبو الدبلومات. يلا كان بوعيدة كيعرف يعبر بوطا راه خصو يمشي حتى الخبز يشوف واش فيه غش ولا لا، ويعبر السكر، وكاع المواد اللي فيها الدعم ديال الدولة. كان بامكانو يمشي يراسل مؤسسات رسمية اللي كتراقب الجودة والغش فالمواد ويشوف ردها. أما بقا تعبر البوطا ونتا ماشي متخصص لا فالغاز ولا هضرت وجبتي القانون للي كيهضر عليه. فهذا ضرب من الخيال. ميمكنش تبقى تنتاقد جميع قرارات الحكومة ومللي يجي القانون المالي تصوت على هاد القرارات للي كتنتاقدها. هادي سميتها سكيزوفرنيا.. وبمتغرابيت سميتها الطنيز. ولكن هادشي عندو تبرير واحد: هو أن هادشي هو مستوى دكتورا عين شمس.