كود- وكالات //

الكاتب الفرنسي الجزائري بوعلام صنصال قال بلي ما بقاش قادر يعيش ففرنسا، حيث كيحس براسو معزول وكيتعرض لهجمات شخصية بشكل مستمر.

فواحد الحفل فبروكسيل، فين دخل للأكاديمية الملكية ديال اللغة والأدب الفرنسي فبلجيكا، صرّح بلي غادي يبقى غير شي شهور قليلة ففرنسا ومن بعد غادي يرحل مني يسالي العلاج ديالو

صنصال قال: “فرنسا سالات بالنسبة ليا”، وتساءل علاش يبقى فبلاد كيتعرض فيها للهجوم من الصباح حتى الليل، وزاد قال بلي داكشي اللي كيتعرض ليه ماشي نقد عادي ولكن إهانة.

كيف ما وضح بلي كاينين شي أصوات قليلة ولكن عندها تأثير كبير فالإعلام والثقافة ففرنسا، وهي اللي كتحاول تشوّه سمعتو، وزاد قال بلي ما غاديش يسكت وغادي يكمل يهضر ويكتب، قبل ما يلمح أنه ممكن يمشي يعيش فسويسرا ولا بلجيكا ويكمل من تما الكتبات ديالو.

وزاد شدد بلي اللي واقع ليه بحال قمع فكري ومحاولة لإسكاته، وقال: “كيصوّروني بحال شي مجرم”، قبل ما يواعد أنه غادي يخرج كتاب ”الأسطورة“  كيعاود فيه تجربتو فالحبس واشنو وقع ليه من بعد .

صنصال كان خدا الجنسية الفرنسية فـ2024، وضرب عام فالحبس فالجزائر بسبب تصريحات ديالو، قبل ما يخرج بعفو من الرئيس عبد المجيد تبون فـ2025.