كود ـ Zappingmedias//

مع كأس إفريقيا المغرب 2025 كاين واحد التحدّي أمني اللي ما باينش بزاف ولكن خطير، وهو احتمال تزاد محاولات الهجرة السرّية لإسبانيا، واللي كتتسمّى عند الناس فلافريك لتحت بـ“بوزا”.

جريدة Zappingmedias الإيفوارية كتأكد أن بعض الحراكة من إفريقيا جنوب الصحراء كيوجدو يستغلو الزحام ديال البطولة، ويدخلو بحالهم بحال مشجّعين جايين للكورة، باش يحاولو يقطعو البحر ولا يوصلو لسبتة ومليلية، وهاد الشي سبق تشاف فمناسبات رياضية كبار.

الجريدة كتضيف أن كلمة “بوزا” معروفة فغرب إفريقيا وكتعني النجاح فالهجرة السرّية لأوروبا. فمناسبة بحال الكان، كاينين شبكات ديال التهريب كتستغل الحدث كغطاء، وكتخلّط الحماس ديال الكورة بتنظيم عمليات هجرة خطيرة وكتأكد أن هاد الوضع داير ضغط كبير على السلطات المغربية، اللي خاصها فـ نفس الوقت تأمّن سلامة المشجّعين والوفود، وتضمن باش دوز البطولة فظروف مزيانة، وتشدد المراقبة على الحدود البرية والبحرية.

الجورنال نفسو كيوضح أن الكان كيبان لعدد كبير من الناس اللي باغيين يحرقو فرصة حقيقية، حيث الفقر، البطالة، وانعدام الأفق كيدفعوهم يغامرو بحياتهم،  وكتقول أن هاد الوضع الإنساني كتستغلو شبكات التهريب، اللي كتربح من اليأس ديال الناس وكتدفعهم يغامرو بحياتهم. الدولة المغربية، بتنسيق مع الشركاء ديالها فأوروبا، خايفة يطلع عدد محاولات العبور خصوصاً نحو إسبانيا، وهاد الشي فيه خطر كبير على الأرواح، والجريدة كتأكد هاد المعلومة.

الجريدة كتختتم بلي ظاهرة “بوزا” ماشي غير مشكل ديال الأمن، راه حتى مشكل إنساني خطير. البحر الأبيض المتوسط ولى من أخطر طرق الهجرة فالعالم، وكل محاولة عبور كيكون فيها ريسك دالموت.