علي الصافي كود -العيون ///

مساء اليوم السبت، خرج وزير الشؤون الخارجية والتعاون الأفريقي والمغاربة المقيمين بالخارج، ناصر بوريطة، علينا فقناة “دوزيم” باش يشرح لينا شنو وقع فمجلس الأمن وسبب فشل تمديد مهمة بعثة الأمم المتحدة فالصحرا “مينورسو”.

هاد الخرجة خاص التعاطي بالواقعية اللي كانت غايبة عن دوزيم بسباب هادوك اللي الصحافيين حاوروه وعطاوه أسئلة فالمتناول وخلاو ليه مساحة باش يجاوب على اللي بغا ويخلي اللي بغا ويزيد يزوق صورتو قدام المغاربة بحال إلى هو اللي كاين فالدبلوماسية المغربية، والدليل حتى ما صحفي قدر أنه يقاطعو.

دوزيم دارت خطأ كبير وغذات الأطروحة اللي كتقول أن المغرب باغي الصحرا بلا صحراويين. كيفاش المحاورين ما فيهم حتى شي واحد من ولاد الجنوب، فينا هو هاد الحكم الذاتي اللي كتقولو. الحكم الذاتي خاصو يطبق أولا فالمؤسسات ودوزيم كانت عندها فرصة ولكن ضيعاتها فاش كلفات صحافيين مع إحترامنا لمسارهم المهني فيما يخص الشأن الوطني، أولا ما عارفين على نزاع الصحرا تا لعبة وثانيا فاش ما دارتش تا صحافي من الصحرا المغربية باش ينقل الأسئلة الحقيقية اللي كيطرحوا ناس الأقاليم الجنوبية لأنهم الأكثر معرفة بالنزاع وحسن من بوريطة ومعرفتو گاع فبعض الحوايج لأنهم عايشين هاد النزاع يوميا ومن خمس عقود.

الخرجة ديال بوريطة كانت فاشلة وما دارتش بالشكل اللي كان خاصها تكون، كان خاص محاورين حسن من هادو عارفين النزاع وحيثياتو، محاورين عارفين الوقائع ماشي صحفيين لا يفرقون بين تقرير الأمين العام للأمم المتحدة والإحاطات ومشاريع القرار وما عارفين بين اللجنة الرابعة واللجنة 24 وبين المبعوث الشخصي والممثل الخاص، والأكثر من ذلك جامع گلحين خلط بين الممثل الخاص ألكسندر إيفانكو وستيف ويتكون مستشار ترامب.

هاد المستوى اللي بانوا بيه هاد الصحفيين ضعيف وضعيف بزاف فنزاع الصحرا، وبانوا بأنهم كيقلبو على الرضا ديال ناصر بوريطة، وبغاو يكونو مساهمين فتقديمو للرأي العام بصورة مزيانة كثر من أنه يجاوب على الأسئلة ديال المغاربة وديال ناس الصحرا بالخصوص.

ناصر بوريطة بان فهاد الخرجة فحيط حافض وكيعاود نفس المعطيات، واللي كانت مبنية على فشل مجلس الأمن وتسويق هادشي اللي وصل ليه النزاع وعدم التمديد للمينورسو بأنه إيجابي وانتصار وفرصة لبنا باش نطبقو فرض سياسة الأمر الواقع.

فرق كبير بين بوريطة وعمر هلال، بوريطة كيعاود نفس الأسطوانة اللي خافظ فالرقت اللي عمر هلال وكلشي شفنا مداخلتو البارح فاهم وعارف ونحاوز حتى مقاربة رد الفعل نحو الفعل بنفسو فاش أحرج مندوب الجزائر وخلاه يبان ضعيف.

ناصر بوريطة فهاد اللقاء العيان سخر گاع قاموسو الدبلوماسي غير باش ما ينتاقدش روسيا وما يقول تا حاجة فيها بشكل خلانا كمتابعين نقولو أنه وصل بيه الحال يدافع عليها بطريقة غير مباشرة.

زايدون أ السي بوريطة اللي مسمي راسك “مول لمقص” راه ما عطيتينا تا معلومة واضحة ولا جزئية ممكن للرأي العام الوطني يبني عليها، وتخبيتي ورا البلاغ ديال الديوان الملكي بإيعاز من بناة دوزيم، وزايدون كيفاش الرقض الروسي ماشي مفاجأة والى كان ماشي مفاجأة علاش ما عالجتيش مكامن الخلل وصححتي الموقف الروسي بدل ما تبقى دافع على موسكو وتغطي عليها بالترويج لأن الفيتو ديالها فرصة.

خاصك أ بوريطة تقول لينا علاش حنا علاقتنا مزيانة مع روسيا ودائما دايرة لينا العصا فالرويضة، علاش موسكو مستفيدة إقتصاديا وتجاريا منا وحتى فالصيد البحري فسواحل الصحرا مستفيدة ودائما ضدنا، علاش موقفنا فالحرب بين وأوكرانيا متوازن وهوما ضدنا، راه ما بقاتش فالتصاور مع لافروف وترويج التقارب فالصور ديالك معاه، التقارب الحقيقي هو تكون معانا فمجلس الأمن.

ما جاوبتيناش أ السي بوريطة علاش الصومال ما بغاتش تكون معانا وحنا معاها وضد ما يمس سيادتها ومحاولات الانفصال كيف قلتي لينا فنونبر 2025، وما جاوبتيناش علاش فشلنا حقيقة فتمرير مشروع القرار الأمريكي بدل ما تخبى وراء “رب ضرة نافعة” ورينا حنة يديك وجاوبنا ا السيهم بوريطة مال الصين امتانعات.

فهاد الخرجة فحيط ديالك أيضا ما جاوبتيناش شنو ممكن يوقع بعد هاد التمديد والإجراءات اللي غادي دار، وكيفاش غادي نتعاملو مع المبعوث الشخصي ستافان دي ميستورا من بعد فشل التمديد، وواش يقدر يزور بلادنا أو لا، بحكم أن مهمته منفصلة عن المينورسو ومرتبطة بالميار السياسي.

واش ا السيهوم بوريطة دابا المينورسو غادي تخرج من المنطقة فقط ببلاغ ما كاين لا إجراءات لا والو الى قلتي نعم فراع كضحك على المغاربة، حيت اللي كنعرفو أنها دارت بقرار ديال مجلس الأمن وولايتها تنتهي بقرار آخر أيضا ماشي ببلاغ واصريحات ديالك ، وبمناسبة عدم التمديد ليها آشنو هو مصير خطة التسوية المشتركة اللي شرفات عليه الأمم المتحدة ومنظمة الوحدة الأفريقية.

خاصنا وزير خارجية يكون واقعي وجريء ويقدر يوصل للمغاربة شنو واقع بلا ما يتخبع ورا سيدنا وخلف عبارات الدينامية الدولية والتنموية والحكم الذاتي هو الأساس، واش تقدر ا السيهوم الوزير تقول علاش المنتظم الدولي فاش كتهدر انت كيكون معانا وفجيبنا ومن بعد كنلقاوه فمجلس الأمن ماشي معانا.

الوضوح السيهوم بوريطة اللي كتروج ليه، راه أنت أول واحد خاصو يكون واضع وعندو مسؤولية تجاه المغاربة، كيفاش ميريكان الى نشرات خريطتنا كاملة يكفي، إذن علاش الصبليون كتعتارف بمغربية الصحرا وتدعم الحكم الذاتي كيف كتقول كدطر خريطتنا منقوصة من الصحرا ؟

هادوك اللي حفضو بوريطة وحتى هادوك اللي حاوروه نساو أن كاينين صحراويين فتندوف كيعانيو وعندنا مسؤولية تجاههم خصوصا أننم “محتجزين” كيف كتقول، وشنو مصير المغاربة اللي ماتوا فاش كانوا ميدافعو على مغربية الصحرا وهادوك اللي أجرمت البوليساريو فحقهم وبتلات آبائهم وإخوانهم وشنو مصير العيالات اللي تغتاصبو من طرف قيادة البوليساريو.

وبالمناسبة فينا هي قنصلية ميريكان فالداخلة، وفين قنصليات فرنسا وبريطانيا وألمانيا وهولندا علاش ما زال ما حلاتش؟ ااه صافي باراكة علينا جزر القمر وبوروندي.