گود سبور//

عبر هاني بوريدة رئيس الاتحاد المصري على الشكر ديالو للمغرب ملكا وشعبا على الدعم اللي عاطينو للرياضة وكرة القدم ولفوزي لقجع للدور اللي داير باش تبقى العلاقة بين الكورة المغربية والمصرية زوينة، وشكر الجمهور المغربي اللي حضر لتشجيع مصر باش تربح جيبوتي البارح فـ كازا وتتأهل لكأس العالم 2026، وأكد أن المغرب غادي ينظم كاس أفريقيا زوينة نهاية عام 2025، وغادي يشرف أفريقيا بتنظيم مونديال 2030.

وهضر هاني بوريدة بعد نهاية ماتش مصر وجيبوتي فـ تيران العربي الزاولي فـ كازا وتأهل منتخب مصر للمونديال، وقال: “كانشكرو الشعب المغربي والملك محمد السادس على الدعم ديالو الكبير للرياضة وكانشكر فوزي لقجع على استمرار العلاقة الطيبة بين الجامعة الملكية المغربية لكرة القدم والاتحاد المصري للعبة وكانشكر الجمهور المغربي الزوين اللي كان معنا فـ التيران، وكل المسؤولين المغاربة على دعمهم لمنتخب مصر”.

وكمل بوريدة وقال: “كأس إفريقيا المقبلة بالمغرب، غاتكون بطولة زوينة، وعدنا ثقة كبيرة فـ التنظيم الرائع من دولة المغرب، ونتمناو العمر يطوال باش نكونو معهم فـ كاس العالم اللي غادي تبين فيه أفريقيا من خلال المغرب إنها غاتدير كاس العالم من احسن ما يكون”.