كود سبور//

أكد الدولي المغربي السابق حمزة بورزوق أن الناخب الوطني وليد الركراكي كايتقلق وما بقاش كايتقبل الانتقادات اللي كتوجه ليه بسبب طريقة اللعب ديال المنتخب المغربي والمشاكل اللي كايعاني منها، وأعتبر أن حكيم زياش ما خاصوش يكون كابيتان وما كايناش بلاصتو فليكيب ناسيونال، وأن اللي كايستاهل يكون كابيتان هو أشرف حكيمي.

وهضر حمزة بورزوق فبودكاسط الكورة فالتسعين، وقال: “إلى رجعنا للندوة الصحافية كايبان أن وليد الركراكي كايتقلق ملي كانجبدو له بار إيكزامبل علاش ما لعبتيش بلالين داطاك اللي لعبت فأولمبياد باريس، حنا بغينا نقولو له ماشي ضروري هادوك الاختيارات ولكن بعينا نشوفو هاديك الطريقة ديال التنشيط لا هجوميا ولا دفاعيا”.

وبخصوص حكيمي وزياش قال بورزوق: “زياش كايجاوب على راسو بالمستوى اللي بان به ضد الگابون راه باقي ما لعبش، وحتى الأدوار القيادية ديال حكيم زياش راه يساءل على لاكسيون ديال بينانتي مع العلم أننا كاندويو على لاعبين محترفين والبنانتي كايكون مكتوب فالورقة شكون غايلعبو الأول وشكون الثاني والثالث، وزياش إلى كان هو المنفذ واحترم هذاك الأمر راه من حقو، ولكن حنا كاندويو على الأدوار القيادية ديال الكابيتان، القائد راه خاص يدخل معه واحد خوه فالگروب اللي محتاج يماركي الهدف الأول باش يحيد هذاك البلوكاج النفسي اللي عندو وحنا داويين على دياز، وشفنا كيفاش حكيمي فالألعاب الأولمبية عطى الثقة لرحيمي وكيفاش حكيمي ورحيمي عطاو الثقة لموهوب”.

وكمل بورزوق: “يعني هذا واحد الفعل خاص يتعامل معه الناخب الوطني على أنه عندنا واحد الكابيتان عندو كراكطير شويا صعيب ويقدر ما يخدمش المصالح ديال الناخب الوطني وكيفاش كايبغي يخدم، وحنا كانعرفو وليد الركراكي كايهتم بالگروب وبالعلاقة ديالو واذا كان هذا الشي غايدير لك 1% من المشاكل فالتيران، راه خاصك تاخد قرارات جريئة، وانت عندك سوبر سطار واحد كايلعب فريال مدريد (ابراهيم دياز) وواحد مازال ما كايلعبش (حكيم زياش) وانت اللي باغي تعاونو والبلاد كاملة باغيا تعاونو وهو ما باغيش يعاون صحابو باش يضربو بينانتيات ويدخلو فالماتشات، ومزيان اللي ابراهيم دياز ماركا فالماتش”.

وزاد قال بورزروق: “زياش ماشي البروفايل ديال وسط التيران اللي بغيناه فالمنتخب دابا، خصوصا ملي كاتشوف هذا الكم الهائل من اللاعبين اللي عندهم جودة فالمنتخب، وزيادة على الضعف البدني ديال زياش وقلة التنافسية اللي عندو خاص ترد البال حتى للتصرفات ديالو داخل التيران وكان شارة العمادة تدوز لأشرف حكيمي وهو الأحق بها فهاد الوقت عندو روح القيادة للگروب وزياش خاصو يمشي يخدم على راسو”.