گود سبور//

تسلم المغرب، محمد بودريقة الرئيس الأسبق للرجاء الرياضي والبرلماني السابق والقيادي بحزب التجمع الوطني للأحرار من عند ألمانيا.

وحسب مصادر “گود”، وصل محمد بودريقة لمطار محمد الخامس بالدار البيضاء اليوم الخميس على متن طائرة الخطوط الملكية المغربية، اللي جات به من مدينة هامبورگ الألمانية، ونزلات قبل قليل فكازا وبالضبط مع الثمنية و40 دقيقة.

قاضي التحقيق كان دار عليه أمر دولي ودابا غادي يهزوه من المطار لسجن عكاشة حتى يقرر قاضي التحقيق يستامع ليه فالملف ديالو.

ودابا كاينين 3 ديال الرؤساء سابقين من الرجاء الرياضي فحبس عكاشة فكازا، حيث وإلى جانب محمد بودريقة كاين عزيز البدراوي اللي مازال كايتسنى الحكم يصدر فقضية صفقة النظافة ديال بوزنيقة اللي متابع فيها، ومحمد أوزال اللي تحكم بـ3 سنين ديال الحبس فقضية عندها علاقة بلاسيرونس، وبالمقابل كاين رئيس ودادي سابق فالحبس هو سعيد الناصيري اللي متابع فقضية إسكوبار الصحرا وغدا عندو جلسة ثانية غاتسمع له فيها المحكمة، وهنا السؤال اللي كايتطرح، واش هذا الديربي ديال عكاشة بين الرجاويين والوداديين تقدر تكون فيه نتيجة جديدة وشي ريمونتادا ودادية، ولا ممكن يخرج شي واحد فالمتابعين فحالة اعتقال من الناديين براءة.