كود سبور//

كيواصل المكتب المديري للرجاء الرياضي برئاسة محمد تدعيم صفوف الفريق بانتدابات جديدة، وحل المشاكل ديالو ومنها المنع من الميركاتو، وتوفير موارد مالية اخرى من الاعتماد على مداخيل الجماهير بسبب الويكلو.

وكشف محمد بودريقة رئيس الرجاء الرياضي، خلال المرور ديالو مع موقع جماهير النادي “ديما ديما رجا”، أن الفريق توصل إلى اتفاق مع مهاجم جديد من أمريكا اللاتينية باش يسنيو معه خلال الميركاتو الجاي، وهاد الشي بعدما اقتنعت اللجنة التقنية للنادي بالإمكانيات ديالو، ووضح بلي غيوصل على الرجاء إلى الإمارات على هامش معسكر الفريق تماك باش ما تعطلوش إجراءات الفيزا فالدخول إلى المغرب وتماك غيسنيو معه.

محمد بودريقة تكلم حتى على مشكل المنع من الانتدابات، وأكد أن الفريق عندو أحكام نزاعات فالفيفا، ولكن غيتغلبو عليها وكشف بلي بركو مع العصبة الوطنية لكرة القدم الاحترافية باش يحلو مشكل نزاعات اخرى وأن الأمور غاديا فطريق الحل وبلي النادي ربح نزاع القيمة ديالو 400 مليون، وتأسف للطريقة اللي كان كيتسير بها النادي خلال المراحل الماضية، وعبر على السعادة ديالو بالدعم المعنوي اللي كيتلقاه هو ومسؤولي الخضرا اللي معه من طرف الجماهير على مواقع التواصل الاجتماعي وأكد أيضا، أن الغياب ديالها مؤثّر ماليا ولكن قدرو يعوضو هذا الشي بمستشهرين يدعمو النادي ماليا.