كود سبور مصطفى الشاذلي ///
واش اللي دارو محمد بورديقة رئيس الرجاء ورجل الاعمال وبرلماني الاحرار كيتقارن باللي دار حميد شباط زعيم الاستقلال السابق وعمدة فاس الاسبق؟ طبعا لا. اللي دار شباط كان عندو علاقة مباشرة بتدبير الشأن المحلي. مشى لالمانيا وتركيا وما عمر شي حد طالب بارجاعو ولا بمحاكمتو ورجع وكيتمتع بثروتو لكبيرة واخا هاد السيد كلشي دارو بالسياسة. ما عمرو كان رجل اعمال ولا غيرو. كلشي على ظهر السياسة
بودريقة بان فالاستثمار فالعقار فكازا مع عائلتو. رجاوي مجنون من نهار عقل. من البيزنس تلاح للكورة وولى رئيس للرجاء البيضاوي ومنها دخل للسياسة على ظهر لحمامة وولى رئيس جماعة مرس السلطان فكازا وبرلماني عن نفس الدائرة وامين عام مجلس النواب. هاد الشي غادي يبدا يمشي ليه شوية بالشوية.
بودريقة تصدم باش تشد خوه عبد الله فشي ملف عندو علاقة بالتزوير كيهم شي عقار حدا كازا. بدات المصائب كدور بيه. عودتو لرئاسة الرجاء البيضاوي زادت غرقاتو. ديك نهاية كأس العرش ضد بركان هادي عامين واللي خسراتها الخضرا كانت بداية لنهايتو. قضية تذاكر مونديال قطر اللي تجبد اسمو فيها ماشي هي بداية نهايتو. فقطر تعامل بسذاجة باش قبل الاشراف علي التذاكر. عجبو الحال وما كانت متوقع ان هاد الملف غادي يوسخ صورتو بالاساس.
ايلي لاحظتو ان بورديقة الرياضة والسياسة اللي غرقاتو وخرجات على البيزنس ديالو وشباط السياسة هي اللي عتقاتو وخلاتو من اعيان البلد.
دابا اشنا هي قضية بودريقة؟ رجل اعمال عندو التزامات فالسوق كياخد بحال كلشي شيكات فانتظار بناء مشروع او ترخيص او شي حاجة. غير هو مع السياسة خلص الثمن مضاعف. عقلتو نهار سول وزيرة السكنى فاطمة الزهراء المنصوري علي تعطال مشاريع العقار فكازا وكيفاش مدير الوكالة الحضرية بنعلي كيعيق هاد الشي؟ ما كانش السؤال بهاد الوضوح ولكن المعنى هو هادا. اللي وقع ان الوكالة الحضرية انتقمات منو. كان عندو ترخيص منها لشي مشروع فالحي الحسني وتسحب منو. باش كيحصل شي حد علي موافقة من الوكالة الحضرية راه كيبدا يجمع لفلوس باش يخدم ويرجعهم باش يكمل. غير هو خدا لفلوس وتسحب منو المشروع وبدات المشاكل كتكثار عليه.
الورطة اللي فيها هو المسؤول عليها ولكن كاين جزء من المسؤولية للوكالة الحضرية دكازا.
بوريقة باش حس باللي القضية قصاحت هرب للخارج بحجة اجراء عملية جراحية على القلب. كان بغى الوقت باش يقاد امورو ويرجع. اللي دارو ماشي جناية. كيوقع فعالم البيزنس. اللي ما مفهومش كيفاش الدولة كلها تحركات ودارت موندا داري دولية ليه. علاش ما داروهاش مع وحدين خراين متورطين فقضايا فساد كتهم المال العمومي ماشي البيزنس.
بورديقة ممكن يحل مشاكلو مع التجار بحالو ولا ما حلهمش راه البيزنس ديالو كولو غادي يمشي. اذن علاش هاد مذكرة القاء القبض الدولية للي بسبابها تشد فالمانيا ودابا المحكمة العليا عندهم غادية تبث فقضية الترحيل. راه داك الشي خربق فرقة كبيرة بحال الرجاء البيضاوي. نفس الفيلم وقع مع الوداد البيضاوي العام اللي فات باش تعتاقل رئيسها سعيد الناصري. لا احد فوق القانون ولكن لا بريء مدان حتى تببث ادانته بحكم قضائي ماشي بشي حاجة اخرى.
قضية بودريقة ما عندها علاقة بتدبير الخضرا ولا تسييرها عندها علاقة بتدبير بيزنس ديالو. اللي كيخلص اليوم هو النادي البيضاوي.
