كود سبور//

تدخل محمد بودريقة رئيس الرجاء الرياضي والمكتب المديري ديالو، باش حلو مشكل ديال مئات الرجاويين بقاو حاصلين فمدينة وجدة بعدما سالا ماتش الفريق مع المولودية الوجدية البارح السبت، برسم الدورة 28 من البطولة الاحترافية لكرة القدم.

وتدخل المكتب المديري للرجاء الرياضي بتنسيق مع السلطات المحلية، وشرا تذاكر ديال القطار للرجاويين اللي حاصلين فمدينة وجدة واللي العدد ديالهم 310 مشجع رجاوي، ودابا غيشدو المشجعين د الخضرا الطريق ديال الروتور من وجدة لمدينة الدار البيضاء عبر القطار.

للإشارة، سالا ماتش الرجاء الرياضي والمولودية الوجدية اللي تلعب البارح فتيران وجدة برسم الدورة 28 من البطولة الاحترافية لكرة القدم، بنتجية التعادل السلبي زيرو لزيرو بين الفريقين، وكل فريق خذا نقطة واحدة، ودابا الرجاء عندهم 40 نقطة محتلين المركز الخامس، والمولودية الوجدية عندهم 29 فالمركز 12.