كود سبور//

نفى محمد بودريقة رئيس الرجاء الرياضي كل ما كيروج بخصوص النقابة فالفريق، وتحكم لاعبين معينين فالتشكيلة اللي كتدخل تلعب، واتهام اللاعب محمد زريدة بتزعم واحد الكروب داخل الرجاء كيتحكم فاختيارات المدرب جوزيف زينباور.

وقال محمد بوريقة فتصريح لموقع مشجعين الرجاءdima dima raja”  ‘‘ حول النقابة فالرجاء: “الإشاعات كتخرج مرة مرة حول بعض اللاعبين وبعض الأسماء بعينها اللي كتقول النقابة وما شابه، وأنا كرئيس الرجاء وقريب من اللاعبين كنفي نفيا قاطعا واش كاين هذا السلوك وسط اللاعبين ديالنا.. ماشي ضروري كل سنة نوجهو سهام الاتهام لشي لاعب، ومن بعدما مشى مذكور نوجهو السهام ديالنا للاعب X أو Y وهذا الشي كيدار ملي كنبداو نقلبو على الأعذار”.

وأكد بودريقة: “جميع اللاعبين كيتحملو مسؤولية الأداء والمدرب جوزيف زينباور حتى هو مسؤول على هذا الشي وعلى التشكيلة باش كيلعب والانتدابات والجانب البدني وخاص كلشي كيتحمل المسؤولية ديالو وهو المسؤول على إدارة الفريق الأول، النقابة إشاعة مغرضة هدفها التشويش وحنا كمكتب مديري ما غنسمحوش بمثل هذه التصرفات، واللاعبين عارفين أن مصير هذه التصرفات هو الطرد وكيفما كان نوع اللاعب.. اللاعبين اليوم منضبطين بشكل تام، كاينين أشياء ولكن كتبقى عادية والأجواء عادية واللاعبين كيقدمو كل ما عندهم، عندنا مشكل فالهجوم والمدرب غيحلو”.