كود سبور//

أكد محمد بودريقة رئيس الرجاء الرياضي بطل المغرب، أن الفريق ممنوع من الانتدابات خلال الميركاتو الصيفي الجاي، وخدامين باش يحلو هذا المشكل، بالإضافة إلى فلوس أشطر منح التوقيع اللي كايتسالوها اللاعبين باش الرجا يوجدو مزيان للموسم الجاي.

وخلال المرور ديالو مع ’’dima dima raja‘‘، الموقع القريب من الرجا، كشف رئيس النادي الأخضر محمد بودريقة، ان الفريق ممنوع عليه الانتدابات خلال الميركاتو الصيفي الجاي، بسبب احكام النزاعات الصادرة من الاتحاد الدولي لكرة القدم والجامعة الملكية المغربية لكرة القدم.

ووضح محمد بودريقة أن القيمة المالية ديال أحكام النزاعات هي 4 المليار سنتيم، 2 المليار هي أحكام نزاعات حكمت فيهم الفيفا لمصلحة لاعبين سابقين ضد الرجا، و2 مليار أخرى هي أحكام صادرة من الجامعة ديال الكورة ضد الرجا لمصلحة لاعبين سابقين آخرين.

وقال محمد بودريقة، إنه هو والمكتب المديري للنادي خدامين باش يحلو هاد المشاكل ديال المنع من الانتدابات، كيفما خدامين على توفير لفلوس ديال أشطر منح التوقيع اللي كايتسالوها اللاعبين، وأكد أن اللاعبين راه كيتسالو مبالع مهمة من أشطر التوقيع كاتوصل نسبتها إلى 60% .

وكمل محمد بوديقة وكشف أن النادي غايخرج بطائق الاشتراك للجماهير وحدد العدد ديالها فـ10 ألاف بطاقة اشتراك، وأكد أنه كان ضد هذه الفكرة ولكن إلحاح أعضاء من المكتب المديري على طرحها للجماهير خلاه يوافق، ودعا بوديقة جماهير الخضرا للانخراط في شراء بطائق الاشتراك لمساعدتهم ماليا باش يكملو خدمتهم لحل مشكل المنع من الانتدابات ويخلصو اللاعبين فأشطر منح التوقيع، وقال ان المكتب المديري راه خدام على توفيق مصادر دخل أخرى من ليسبونسور وغيرهم، ولكن الدعم المالي ديال الجمهور غايعاونهم مزيان، وأن بطائق الاشتراك غايخرجو مع بداية شهر يوليوز الجاي.