كود سعيد الشاوي ///

البارح البام او فاطمة الزهراء المنصوري دفعات بتجميد عضوية صلاح ابو الغالي واحد من القيادة الثلاثية وعضو المكتب السياسي للبام. جمدات عضوية واحد عندو نفس الاختصاصات بحالو. المعني بالامر رفض هاد القرار.
لكن هاد الشي علاش كولو. 
الفيلم بدا هادي سنوات. عبد الرحيم بن الضو الامين العام الجهوي لحزب الاصالة والمعاصرة فالدار البيضاء عندو شركات كثيرة ديال لفروماج. ملايري كبير. دخل للسياسة باش يدافع على مصالحو. هاد الشي اللي وصل ليه دارو بخدمتو ولكن كذلك بدعم ناس كثار اخرهم رئيس الوداد الاسبق سعيد الناصري اللي مشدود فقضية “اسكوبار الصحرا”.

بن الضو شاري بزافت الاراضي فمديونة وفاولاد صالح. كان ديما صاحب صلاح ابو الغالي. شاري من عندهم اراضي كثيرة اخرها هاد الارض اللي نوضات الصداع. 

ابو الغالي كيقول باللي هاد الارض مكلف بيها خوه ماشي هو. كان اتفاق مع بن الضو ووقعو “وعد بالبيع” عند النوطير الشنگيطي اللي هو برلماني عن البام ومعروف باللي ضد ابو الغالي وحلمو يستوزر. باش تفهمو شوية الفيلم ولانجوه ديال هاد الشي كولو. 

المهم توقع “وعد بالبيع” وخدا ابو الغالي مليار ونص. كاينة رواية كتقول باللي هاد الشي تم ففيلا الناصري وبحضورو. 
بالنسبة بنالضو الوعد بالبيع مازال مدة صلاحيتو قائمة. بالنسبة ابو الغالي. السيد تعطل وجا عندو ابراهيم مجاهد مول “مجازين” ورئيس جهة بني ملال السابق وحتى هو من البام٬ وبغى يشري هادي الارض وتافق مع خوه. تمت عليه البيع.

ساق بن الضو للي محكم فالقيادة كلها ديال البام. اتصل بهاديك القيادة وهدد باش يمشي للمحكمة. بنت الباشا واللي معاها قالو ليه بلاش يدخلو. جاتهم فرصة يتخلصو من ابو الغالي اللي عدد من قادة البام ما فهموش كيفاش نزل فاخر لحظة باش يكون من القيادة الثلاثية. 
ابو الغالي كان مرشح يكون امين عام للبام بعد بنشماس. كان اتفاق وكان الياس العماري خبر حكيم بنشماس بهاد لشي لكن هاد الاخير تشبت بالمنصب فاللخر عارفين كيفاش سالات مع بنسماش وكيفاش ابو الغالي ما وصلش للامانة العامة
نرجعو لقضية بن الضو وابو الغالي. القيادة قالت تتدخل وتجري على ابو الغالي وهاد الشي اللي وقع البارح بعد ما خيروه بين الاستقالة والطرد وهو رفض الاستقالة.

بنت الباشا دافعات على بن الضو. هاد لملايري اللي بدا بالتهريب. كان كيجيب لفروماج المهرب من الشمال خاصة كاستييخو ورينكون وباب سبتة….. دور الحركة. دار محل فدرب غلف حتى هو كولو انفورميل. شركة بريزيدان شافت مهرب كيتقضى بزاف من عندها. اتصلت بيه وعرضات عليه يخدم معاها ويتكلف بالماركة فالمغرب. 

بعد التهريب بدا يروج الحركة. شرا محل اخر فدرب غلف وبدا يوزع على بلايص اخرى. بدا كيدير لمعامل والوحدات الخاصة بالفروماج. دابا عندو عدد منها فكازا وحتي فاولاد صالح. 

كان وقع ليه مشكل مع “لونصا” المكلفة بمراقبة جودة الاغدية فميناء طنجة. جات الفرقة الوطنية وتفتح تحقيق وكلشي من بعد ضرب الطم. حتى حد ما عارف فين وصل. كان شي مستخدم عندو قال باللي كيجيب فروماج وكيغير ليه التاريخ. طبعا شهادة ناقصاها ادلة. 

بن الضو عندو قضية اخرى خايبة. قضية ماشي دعم الوداد ولكن لفلوس اللي دعم بيهم واش فلوسو الشخصية ولا فلوس الشركة. الضرائب من المتوقع تدخل فهاد الملف. تحقق معاه ومع عدد من رجال الاعمال

بن الضو دخل للبرلمان علي مصالحو. كان باغي يخلي المنصب لبنتو ولكن تراجع. دار كيف مولف يدير. ياخد قرارات ويتراجع عليها