ݣود ـ بني ملال

لبارح السبيطار الجهوي ببني ملال عرف حالة استنفار كبيرة، مني حاول واحد الراجل ينتاحر ويرمي راسو من فوق السطح، حيث كان كيطالب يعطيوه شي دوا خاص بالمرض اللي كيعاني منّو.

ومني وصل الخبر، تحركو البوليس العلمي والتقني وعدد كبير من رجال الأمن، وحاصرو المكان وسدو المداخل ديال السبيطار، قبل ما يقدرو يقنعوه ينزل بهدوء ويوقف المحاولة ديالو.

من بعد، دّوه للسبيطار باش يتلقى العناية اللازمة، فالوقن لي دارت المصالح الأمنية تحقيق تحت إشراف النيابة العامة باش يعرفو شنو بالضبط وقع وشنو السبب اللي خلاه يدير هاد الفعل.