كود سبور- واشنطن//

من المنتظر يكون أمين بنهاشم مدرب الوداد الرياضي، حاضر فماتش الفريق الأحمر ضد العين الإماراتي، ضمن الجولة الثالثة والأخيرة من كاس العالم للأندية، اليوم الخميس فتيران “اودي” بالعاصمة الميريكانية واشنطن، وهذا الشي واخا تعرض لكسيدا الاثنين اللي فات.

وحسب مصادر مطلعة، فأمين بنهاشم مُلح باش يحضر ماتش الوداد الرياضي ضد العين الإماراتي فالتيران، وباغي يكون المشرف براسو على تدريب الفريق فالماتش، وراه من المنتظر يكون فالتيران مع الفريق الأحمر خلال المواجهة بين الفريقين.

وباغيين الوداد الرياضي يربحو العين الإماراتي، اولاً لحفظ ماء الوجه بعد الإقصاء المبكر من الدور الأول ديال مونديال الأندية بعد الخسارة فالجولة الأولى والثانية ضد مانشستر سيتي ويوفنتوس الإيطالي، وباغيين الوداد يحققو أيضا أول رباح لهم فتاريخ مشاركتهم فمونديال الأندية.