كود سبور- فيلادلفيا//

اعتبر أمين بنهاشم مدرب الوداد الرياضي ان الماتش الثاني للفريق فمونديال الاندية اللي غايكون ضد يوفنتوس الطالياني غايكون مختلف على الماتش الاول اللي خسروه مع مانشستر سيتي، واكد ان الفريق الأحمر دابا غايدخل يقلب على يماركي باش يربح ويتأهل للدور الثاني.

ووضح أمين بنهاشم فتصريح له، وقال: “الماتش الجاي غايكون مختلف على الماتش اللي فات، حيث لا فالاسلوب لا فطريقة اللعب لا فشخصية الفريق بدينا باستراتيجية جديدة هذا الماتش، غانلعبو دابا مع فريق عندو لياقة بدنية قوية واندفاع بدني وفريق ديال التحولات وحتى أسلوب اللعب مختلف على أسلوب مانشستر سيتي وهذا الشي بدينا الخدمة فيه قبل ما نجيو لميريكان ولكن دابا دخلنا فليديطاي، وغانحلو نلقاو طريقة لعب مناسبة”.

وكمل بنهاشم: “الماتش الاول كان ضد مانشستر سيتي فريق من أصعب الفرق ديال الاستحواذ على الكرة وصعيب تاخد لهم الكرة، وحاولنا نلقاو طريقة اللي نتقاسمو معهم الماتش وهي تاخذو المساحات حيث صعيب ناخدو الكورة والتحكم ديالنا كان خاصو يكون فالمساحات، ونجحنا فهذا الشي بنسبة مهمة وخلانا نبانو بأداء مقبول نوعا ما، ولكن الماتش الجاي ضد يوفنتوس مختلف، وغانلعبو فيه بأسلوب اللي نحدو به من خطورة هجومهم وتكون عندنا حظوظ باش نمشيو ونماركيو، حيث خاصنا نماركيو ونربحو، وكيف قلت من قبل راه دابا خاصنا نقلبو على النقاط والتأهل، كانت عندا الدهشة فالماتش الاول حيث ماتش ديال الافتتاح ضد مانشستر سيتي واحد من احسن الفرق فالعالم وكان شويا ديال الارتباك ولكن دابا دخلنا فالمنافسة وخاصنا نبينو ان المغرب دائما فالمحافل الكبرى قادر يحقق نتائج ايجابية ومفاجأت”.

وزاد وضح بنهاشم وقال: “الطريقة باش كايلعبو يوفنتوس مختلقة وصعبة بزاف، وكايلعبو بثلاثة مهاجمين اللي ما كاتحسش بهم وهذا الشي اللي كانقلبو له دابا على حلول باش ما يتماركاوش علينا اهداف، حيث يوفنتوس عندهم حلول كثيرة والماتش ديالهم ضد العين الإماراتي شفناه وعطانا فكرة وحتى اللاعبين شافو المشاكل اللي خلقوهم يوفنتوس للعين وحنا غانتفداوهم ونتمناو خط الدفاع ديالنا يكون فنهارو باش نوقفو المهاجمين القويين ديالهم، دابا كاينة الثقة حيث فالاول كان صعيب تكون عندك، حيث الفريق تبدا بواحد العدد كبير من اللاعبين وما كناش عارفين المستوى الحقيقي ديالنا فمواجهة فريق قوي ودابا عرفنا المستوى ديالنا”.