كود سبور//

خرج المدرب محمد امين بنهاشم، وكشف في على السبب ورا الفراق ما بينو بين نهضة الزمامرة، اللي جا على غفلة خصوصا وان الفريق محتل المركز الثاني فالبطولة الاحترافية اللي ما عمرو كان يحلم به، بالإضافة لأن هذا الفراق جا قبل من ماتش الدكاليين ضد الجيش الملكي اليوم السبت برسم الدورة 24 من البطولة.

ووضح محمد أمين بنهاشم فبلاغ خرجو قبل لحظات من اليوم السبت، وقال: “18 شهر دوزتها مع نهضة الزمامرة، وقررنا إنهاء التعاون ديالنا بالاتفاق المتبادل، وكايجي هذا القرار بعد مناقشات حول تجديد عقدي وهذا الشي بغا النادي يسالي منو دابا، ولكن أنا كانشوف انه من الأحسن نتسنى حتى يسالي الموسم باش تكون عندي رؤية واضحة مزيان للوضع والأهداف اللي جايا”.

وكمل بنهاشم، وقال: “ما رفضش بشكل قاطع، واخا ان هذا حق مطلق، ولكن فضلت ببساطة ناخذ الوقت مازال باش نقرر القرار اللي يتماشي مع الاهداف ديالي الشخصية والمهنية، حيث ما كانش التوقيت مزيان لاتخاذ قرار مستنير، وكنت وسط الموسم مع ماتشات مهمين وحاسمين بزاف، وكان الهدف ديالي هو نبقا مركز باش ناخذو تصنيف يتناسب مع الخدمة اللي درنا على طول الموسم”.

وشكر المدرب محمد امين بنهاشم نهضة الزمامرة والمكونات ديالو: “كانبغي نشكر ادارة النادي والجهاز الفني والطبي واللاعبين وكل من ساهم فهاد المغامرة، وكان ليا الشرف نخدم مع هذا الفريق الملتزم، وكانشكر حتى الجمهور على دعمهم، وراني غادي بحالي وانا راضي على الخدمة اللي درت وفخور بالتقدم اللي حققناه، وكانتمنى للفريق النجاح فالمستقبل”.