كود سبور- فيلادلفيا//

عبر أمين بنهاشم مدرب الوداد الرياضي على التفأل ديالو بخصوص مستوى الفريق اللي غايبان به فمونديال الاندية فالميريكان، واكد ان الواك جا للبطولة باش ينافس ويتقاتل.

وهضر بنهاشم خلال الندوة الصحافية اللي قبل ماتش الوداد ضد مانشستر سيتي، وقال: “اللاعبين كاملين واجدين وراه فايت للاعبين ديانا لعبو ماتشات بهاد النيفو وكاينين شي لاعبين غايلعبو اول مرة وخاصهم يتيقو فريوسهم، وبغيناهم يتمتعو بالمعاشات وها غاتكون صعيبة”.

وكمل امين بنهاشم، وقال: “شفنا فبزاف ديال الماتشات فالمونديال ان شي فوق جاو ولعبو وصافي ولكن حنا جايين باش نلعبو ونتقاتلو وما جيناش باش نلعبو وصافي، راه جينا نلعبو ونتقاتلو ونافسو”.

وزاد بنهاشم، وقال: “الماتش ضد مانشستر سيتي غايكون صعيب وهما واعرين وما نكدبوش على ريوسنا راه لاعبين ضد مان سيتي وكلشي عارف انهم واعرين وكايشدو الكورة ومتعود على هذا الشي وصعيب تحيد لهم الكورة”.

واضاف بنهاشم: “حتى حنا عندنا خطة وطريقتنا وغانطبقوها وغاندخلو باش نخليو الماتش صعيب على اي خصم ديالنا وما غانكونوش فريق سهل”.

وبخصوص هالاند وهجوم مانشستر سيتي، قال امين بنهاشم: “راهم ما واقفينش عند هالان، راه مانشستر سيتي عندهم بزاف ديال اللاعبين الواعرين بحال مرموش واللي يقدرو يديرو الفرق، راه هالاند مشكل من بزاف ديال المشاكل اللي غانواجهو ضد مانشستر سيتي وغانسدو عليهم والماتش ضدهم غايكون امتحان للمدافعين ديالنا”.

واكد امين بنهاشم ان المنتخبات المغربية والأندية المغربية ديما كانت كاتبين على قوتها فالمسابقات العالمية، وخير دليل الانجاز اللي حقق المنتخب الوطني المغربي فمونديال 2022، وقال ان اللاعبين المغاربة لاعبين ديال للتحدي، والوداد ما غايكونش فريق ساهل.