كود الرباط//

قال شكيب بنموسى، وزير التربية الوطنية والتعليم الأولي والرياضة، بأن الأساتذة والموظفين لي تم توقيفهم من طرف الوزارة ماشي بسباب بالإضراب بل بسباب التجاوزات لي دارو.

واوضح بنموسى، اليوم فالندوة الصحفية لي جات مورا اجتماع المجلس الحكومي، غايتم اتخاذ قرارات بخصوص هاد الأساتذة الموقوفين من طرف لجن إدارية فالجهات، واللي غاتدرس كل ملف بوحدو.

بنموسى قدم اليوم فمجلس الحكومة عدد من المراسيم لي كتهم القطاع خصوصا، النظام الأساسي الموحد لموظفي التربية الوطنية وللي فيه امتيازات وزيادات فالصالير.

وقدر بنموسى تكلفة هاد النظام الأساسي والمجهودات لي دارت مؤخرا، بـ17 مليار درهم فيها تقريبا 9 مليار درهم ديال زيادة الصالير على شطرين (1500 درهم فعامين)، والتعويضات التكميلية والمسارات المهنية.