أحمد الطيب – كود الرباط///

علمت “كود” أن شكيب بنموسى، وزير التربية الوطنية والتعليم الأولي والرياضة، كيستعد هاد السيمانة، باش يعلن على فتح مباريات لشغل منصب مدير ثلاثة أكاديميات على المستوى الوطني.

مصدر مقرب من الوزير بنموسى قال لـ”كود” إن الوزارة معولة على مسؤولين عندهوم الكفاءة والاستقامة، مؤكدا بالقول: “العهد القديم اللي كان فيه باك صاحبي والمحسوبية انتهى واللي عندو الكفاءة وقادر يعطي يجي”.

وحسب مصادر “كود” فإن الأمر يتعلق بمنصب مدير الأكاديمية الجهوية للتربية والتكوين بجهة العيون الساقية الحمراء ومنصب مدير أكاديمية جهة كلميم واد دون، بالإضافة إلى منصب مدير الأكاديمية الجهوية للتربية والتكوين بجهة فاس مكناس.

وقالت المصادر ذاتها، أن منصب مدير أكاديمية كلميم غادي يتم الإعلان عليه حقاش المدير السابق مشا للرشيدية، ومدير أكاديمية العيون وصل لسن التقاعد وكانوا دارو ليه التمديد وسبق للوزارة لُونصات المباراة لكن حتى شي حد مطلع ودبا غادي تعاود المباراة.

الوزير بنموسى باغي مدراء عندهوم الكفاءة باش يخدمو هاد ثلاث جهات من أجل التنزيل الأمثل لخارطة الطريق اللي باغية الدولة ماشي مسؤولين اللي وقفو عجلة إصلاح منظومة التربية والتكوين وكان للأسف بعضهم كيدير تصفية حسابات مع موظفين وعندو شبهة اختلالات فالتدبير والتسيير.