كود الرباط//
أرقام جديدة قدمها المندوب السامي للتخطيط شكيب بنموسى على الخصوبة فالمغرب خلال نتائج الإحصاء العام، كتبين أن كل امرأة مغربية عندها أقل من طفلين، الشي اللي خلا معدل الخصوبة يطيح تحت ’’عتبة تعويض الأجيال‘‘.
بلغة أوضح، المغرب كايتجه نحو شيخوخة سكانية ماشي بعيدة، حيت ما بقاش العدد الكافي ديال الأطفال اللي يعوضو الأجيال القديمة.
رغم هاد التراجع، كشف بنموسى اليوم الثلاثاء فندوة صحافية، أن جهة درعة-تافيلالت بقات صامدة وكتسجل أعلى معدل فمؤشر الخصوبة، وهادشي راجع غالبًا لطبيعة المجتمع العائلي التقليدي فهاد الجهة.
بنموسى وضّح أن الوضع كيستدعي التفكير فحلول استراتيجية باش نواجهو هاد الانخفاض، سواء عبر تحسين أوضاع الأسر، دعم التوازن بين الخدمة والعائلة، ولا خلق سياسات تشجع على الإنجاب.
المغرب مقبل على مرحلة جديدة، التراجع فالخصوبة يقدر يولي مشكلة كبيرة فالتوازن الديموغرافي والاقتصادي.
