كود ـ الرباط //

بمناسبة استضافة المغرب لكأس أمم إفريقيا 2025  (CAN 2025)علن بنك المغرب على إصدار ورقة نقدية جديدة من فئة 100 درهم فيها تصاميم فنية كتجمع بين الهوية الوطنية وروح الحدث القاري، هاد الورقة رسمية وقانونية للتداول، ماشي غا فلوس ديال  السوفونير، الإصدار دابا مؤقت ومحدود، يعني غادي تبقى فالتداول ولكن بالكمية لي طبعات فقط، باش يحافظو على قيمتها الرمزية والتذكارية وحتى مع كونها قانونية، غا تبقى مهمة عند هواة جمع الفلوس التذكارية.

الورقة الجديدة كتتميز بتصميم كيعكس الثقافة المغربية والرياضية، حيث  فالواجهة الأمامية كاينة صورة ديال سيدنا وعناصر فنية مرتبطة بكرة القدم، أما اللور، كتشمل ملعب الأمير مولاي عبد الله فالرباط، أحد الملاعب الرئيسية فالبطولة، ومعاه رمز إفريقيا وأشكال جرافيكية مستوحاة من التراث المغربي. والجديد هاد المرة هو حروف التيفيناغ اللي مكتوبة فالورقة الجديدة.

ورقة 100 درهم الجديدة كتدمج اسم بنك المغرب بالتيفيناغ جنب العربية واللاتينية، وهادشي كيبرز الهوية الأمازيغية للمملكة وكيحتفي بالتنوع الثقافي واللغوي ديال المغرب.

الورقة الرسمية فيها ميزات أمنية جديدة كتخليها صالحة للاستخدام اليومي، وفي نفس الوقت كتحتفظ بالبعد الاحتفالي والثقافي المرتبط بكأس أمم إفريقيا 2025.