الرئيسية > كود-تيفي > بنكيران ف”لايف” اليوم: اتهامنا بالتجسس استهداف لدولة عظمى بحال المغرب.. ومايمكن غير نوقفو فصف ملكنا وبلادنا.. وتحية للمخابرات اللي كتدير خدمتها باش يكون الأمن والحموشي راجل مزيان – فيديو
24/07/2021 21:00 كود-تيفي

بنكيران ف”لايف” اليوم: اتهامنا بالتجسس استهداف لدولة عظمى بحال المغرب.. ومايمكن غير نوقفو فصف ملكنا وبلادنا.. وتحية للمخابرات اللي كتدير خدمتها باش يكون الأمن والحموشي راجل مزيان – فيديو

بنكيران ف”لايف” اليوم: اتهامنا بالتجسس استهداف لدولة عظمى بحال المغرب.. ومايمكن غير نوقفو فصف ملكنا وبلادنا.. وتحية للمخابرات اللي كتدير خدمتها باش يكون الأمن والحموشي راجل مزيان – فيديو

عفراء علوي محمدي- كود//

قال عبد الإله بنكيران، رئيس الحكومة السابق والامين العام السابق لحزب العدالة والتنمية، ان احوال المغرب عادية، وفالإعلام والخارجي بالخصوص، واخا تم اتهامو بالتجسس، والضجة كانت فاللول لكن من بعد كيشوف أنها تهدنات، وقال أن البلاد قادة بشغالها، وما على المغاربة غير يوقفو فصف بلادهم وملكهم.

https://www.facebook.com/1634847513416903/posts/3043425105892463/

اللي قال المغرب تجسس مغفل وماكيعرفش بلادو

وزاد، فلايف ليه على صفحتو الرسمية ف”فيسبوك”، ان فطرة المغربي كتحتم عليه يوقف فصف بلادو مهما كانت الظروف، وإلى ماعجباتوش شي حاجة كيسكت، وفالمقابل استغرب لناس خرجو كيقولو ان المخابرات المغربية كيتجسسو على الملك محمد السادس، “هذا اللي قال هذشي كذاب، وماعرفتش آشنو كيضايقو، واللي كيمارس السياسة وكيتابع الأخبار كيعرف ان هذشي ديال التجسس لا يتوقف بين دول العالم…”، حسب كلامو.

وتساءل واش المخابرات الدور ديالها هي تبقى ناعسة وماديش خدمتها حتى يوقعوا المصائب، واعتبر أنها كتدير دورها بمنطق كوني باش تحمي البلاد من التهديد، والإنسان “ماخصوش يكون مغفل او متغافل، حيت هذشي معمول بيه فدول العالم، والحمد لله كلشي بيخير فبلادنا… هذ الناس ماكيعرفوش المغرب، وماعرف آش بغاو بالمغرب”، كيف قال بنكيران.

فهذ الزمان جميع الدول مستهدفة والمغرب حتى هو

وقال أنه فهذ المرحلة، كلشي مستهدف، ودول كثيرة كتستهدف دول اخرى، فما ادراك بالمغرب اللي هو ماشي دولة قوية كميريكان والشينوا، لكن عندو تاريخ وحضور، وعندو دور تاريخي قام بيه بشرف، ومستهدف من طرف حكام الجيران، اللي مابغاوش يراجعو راسهم ويشوفو الطريق اللي غاديين فيها انها مافيها حتى نتيجة، حسب تعبيرو.

وتابع بنكيران: “حلو عينيكم!! ماكايناش شي دولة كدير هذشي بطريقة عشوائية، كاين حسابات وترتيبات، بحال سكت هنا على القتل بالكيماوي، وهنا للى دري غوت تنوض قربالية، كنت ماغنتكلمش لكن شفت المغاربة ماداينهاش فهذشي، هذي فرصة باش ننبهم، المغرب ماشي دولة عظمى، لا ما عظماش، لكن عندنا نصيب من الديمقراطية والحرية وأشياء محترمة، وناجحين فقضية الصحراء ومحاربة الارهاب، وهذشي كيشيد به في العالم كلو”.

خاصنا نوقفو جنب ملكنا ونشدو فإمارة المؤمنين

وشدد بنكيران على اهمية الملكية والنظام الملكي وإمارة المؤمنين، كيقول: “60 سنة وانا كنمارس الحياة السياسية من صغري، وكنعرف المغرب وعشت سنوات الجمر والرصاص بافكاري، ومشيت للسجن وتحولات هذ الافكار، وكنت ضد الدولة والملك، اما دابا فهمت الكثير واقتنعت ووليت من اشد انصار دولتنا، وكنقول أن المغربي خاص يكون هكا… الملك قاد بشغالو والى بغانا نعاونوه خاص نكونو موجودين”.

وطلب من المغاربة يشدو فالملكية ديالهم، باعتبارها ضامن عتيد وقوي من اجل تقدم البلاد وازدهارها، وان المغرب محسود على هذشي، وكيتم استهدافو لإضعافو.

المغرب عريق ومتقدم وديمقراطي

والشي اللي كيخلي للمغرب حساد كثار، حسب بنكيران، هو كونوا عريق، وكيتعتبر اقدم دولة عربية واسلامية عندها الملكية، “ربما سبقتنا الصين او اليابان عالميا، لكن دول اخرى كانو بحال المتوحشين عايشين، وكاينين دول يالاه لبارح تزادت مامكملاش ميات عام”، حسب تعبيرو، وقال ان بزاف ديال الدول العربية والإسلامية للآن حالتها، واللي شافها ممكن يخاف ويتخلع، فالوقت اللي المغرب دولة آمنة ومستقلة وفيها ديمقراطية.

ولكن مانفاش بنكيران ان البلاد كتعرف بعض المشاكل، بحال وجود قوانين مجحفة للاحزاب بحال القاسم الانتخابي، او البلوكاج اللي كان تدار ليه باش خرج، لكن عموما، بالنسبة ليه المغرب كيتقدم مقارنة مع المرحلة اللي سبقات.

الامن فالبلاد داير خدمتو والحموشي راجل مزيان

وكيشوف بنكيران ان البلاد غادة مزيان بفضل الناس المشرفين على الامن، وطلب من المغاربة باش مايظلموهومش، وعلى راسهم عبد اللطيف الحموشي، “هو ماشي انسان مثالي لكن حسب قناعتي هو احسن واحد تولى الملف الامني، يقد يكون غلط، لكن ماكاينش مجال معرض للخطأ كثر من الامن والمخابرات، انا كنعرفهم كثر من بزاف حيت كنت رئيس حكومة، هوما ولاد الناس، لكن النظامات باش خدامين عندهم منطق… اما إلى شي مواطن حس براسو مظلوم انا نخرج نناصرو ومانظلموش”، حسب اعتبار بنكيران.

العدالة والتنمية مستهدف حتى هو

وضرب بنكيران مثل استهداف المغرب باستهداف صحافيين ونشطاء على مواقع التواصل الاجتماعي لحزب العدالة والتنمية، كيقول بنكيران على هذشي: “حزب العدالة والتنمية مستهدف ورادينو بوعو، بغيت نعرف غير شنو دار الحزب ديال السوء؟ باستثناء إلى كان شي عضو ضعيف شوية لكن دار اللي عليه…”

موضوعات أخرى

18/09/2021 13:30

جهة فاس مكناس.. انتخاب نوفل شباط رئيس لجماعة “برارحة” والفايق خدا الرئاسة فـ جماعة ولاد الطيب بالأغلبية ولعفو فـ جماعة عين الشقف والبوزيدي فـ تاونات