كود الرباط//

وزارة إعداد التراب الوطني والتعمير والإسكان وسياسة المدينة، طلقات مارشي كبير للي غايسيل لعاب شركات التواصل خصوصا وان قيمتو نصف مليار سنتيم، بحيث الهدف من الصفقة هو إعداد وتنفيذ خطة تواصل وترويج رقمية وغير رقمية لصالح أنشطة الوزارة.

الميزانية المخصصة لهاد المارشي كبيرة، وكتوصل لـ5 مليون درهم.

الطلب ديال الصفقة تحت رقم 2025/17، غادي يتم فتح الأظرفة ديالو نهار الجمعة 11 يوليوز 2025، مع العاشرة صباحًا، فمكتب مديرية التعاون والشراكة والتواصل فحي الرياض بالرباط.

وحسب الوثائق الرسمية، فإن الضمان المؤقت محدد فـ50 ألف درهم، واللي باغي يشارك خاصو يحترم الشروط التنظيمية المنصوص عليها فالمواد 30، 31، 32، و34 من المرسوم ديال 8 مارس 2023 المتعلق بالصفقات العمومية.

هاد الخطة التواصلية، حسب الوثائق اللي توصلات بها “كود”، كتشمل إنتاج أفلام مؤسساتية، وصلات إذاعية وتلفزية، كبسولات رقمية، نشرات دورية، وأيضاً مواكبة كاملة للتواصل فالوسائط الرقمية من فيسبوك وتويتر حتى تيك توك ويوتيوب.

دبا قريبة الولاية الحكومية تسالي، وعاد بغات الوزيرة المنصوري طلق مارشي فالتواصل، واش هادشي عندو علاقة بالانتخابات المقبلة وشنو غاتروج؟ حتى الوكالات الحضرية مدايرش خدمتها ف اكثر من مدينة شوفو غير طنجة والشمال، اما كازا بلا ما نهضرو عليها. ولا هاد المارشي من ابداع ووصية الوزير الشاب بنسعيد لي كيعجبو هاد نوع د المارشيات بتلميع صورة وزيرة قليلة الحضور وللي عندهم حصيلة شبه ضعيفة فتدبير قطاع كبير.

أسئلة ولات كاطرح حتى وسط المهنيين فالتواصل، واش هاد الميزانية معقولة مقارنة مع الأهداف؟ وشكون الشركات المحظوظة للي غادي تدفع وللي غادي يهزوها ف مراحل الاولى ومن ثم الشركة لي غاتربح المارشي واش عندها القدرة تجيري هاد الحملة الانتخابية السابقة لاوانها.

تفاصيل المارشي كامل منشورة على بوابة الصفقات العمومية www.marchespublics.gov.m.