كود هناء ابو علي ///

وزير الشباب والثقافة والاتصال محمد بنسعيد اللي هو واحد من 3 فامانة حزب التراكتور دخل مرحلة هديان خطيرة. رجع راسو مقدس فهاد لبلاد. ف”كود” فينما كيكون مقال نقدي علي هاد لوزير كيطلق كلابو فشركة مكلفة بالفايسبوك باش دير السينيال. شكون كيخلص هاد الشي؟ الدولة المغربية. هادي ما عمرها كانت فتاريخ هاد لبلاد. وزير كيخلص بفلوس الدولة. سطرو مزيان المال العام٬ باش يمنع الصحافة تنتاقدو. الشركة للي شادها ديال صاحبو شي بناني سميرس وخدم فيها شي مستشار كان قودها فقضية “طوطو” وعوض يتفارق معاه وحقاش كاينة امور اخرى بيناتهم لاحو عند هاد الشركة.

دابا بنسعيد ممنوع تكتب عليه وتحطها فالفايس مثلا٬ تصورو ما كاين حتى وزير كيديرها باستثناء بنت الباشا فاطمة الزهراء المنصوري وهو. 
الغريب ان كلشي ساكت على هاد السلوك المتخلف المسيء للبلاد اولا ماشي لوزير كيسيء وبزاف لمهنة وزير. شوفو كيفاش دار ندوة صحافية ول البارح مع رشيدة داتي وزيرة الثقافة الفرنسية  تعرفو حجمو. رجل على رجل. ما موجد والو. كرر كلام داتي. خلط بين تمثيليتو كممثل للدولة وبدا يهدر باسم الحكومة. تهدل بمنصب الوزير

سبق ليه ضرب الدولة باش ولى كيرسل مستشار ديالو بدون مستوى بدون مهمة فالحكومة. مستشار. وفسابقة فتاريخ الحكومات فالبلاد٬ رسلو يمثلو فالاردن وفالبحرين. الاخطر من هاد الشي٬ خرج اسمو فبيان رسمي ووكالة المغرب العربي للانباء نشرات الخبر وباسمو. المستشار الوحيد اللي كيكتبو اسمو لاماب هو مستشار سيدنا باش كيكون مكلفو بمهمة. هاد الشي مشى مع بنسعيد. شوفو الاستهتار فين وصل. باش شاف كلشي دايز ليه ولى كيدخلو للقصر. اييه كيدخلو للقصر بتواطؤ مع شي حد خدام تماك. ما عندوش الصفة يكون فزيارة ماكرون.

غاديين تصدمو كثر باش تعرفو ان هاد لوزير داير صفقات مع عدد من الجورنالات فالبلاد. تصورو وزير الاتصال كيساوم صحف عايشة مشاكل كثيرة٬ بكونترات تقدر توصل لجوج مليون درهم سنويا والمقابل٬ يلمعو صورتو ويديرو معاه حوارات. لفلوس لكثيرة عاطيها للصحاف بالفرنسية. 
كيفاش وزير اصلا يدير عقود مع وسائل اعلام باش يدافعو عليه ويخلصهم بفلوس الدولة. ولفضيحة اكثر باللي هادا وزير الاتصال. هي فضيحة فضيحة. 

الحكومة خاصها تخرج قرار يمنع منعا تاما شي وزير يدير عقود مع صحف او يخسر فلوسو باش يسوقو راسو. اللي خاصو يتسوق ليه وفمناسبات باينة هي المشاريع. خاص منع السبونسورين لاعضاء الحكومة. 

شوفو غير صفحة من صفحات باسم “مهدي بنسعيد” فالفايسبوك. كنقول صفحة وحدة٬ خاسر عليها سبونسورين كثر من 15 الف دولار. 

هاد لوزير دار هاد الشي باش لقى السيبة. هاد السيبة اللي خلاتو داير ما بغى وماشي غير فالحكومة. هاد لشي كولو وما عندوش لا الثقافة ولا عند هادوك مستشاريه الكالبير يوجدو ليه مشروع سياسة ثقافية للبلاد. كلشي كيضرب غير على الشعا