كود أصيلة //

عرفات مدينة أصيلة تطورات جديدة فالقضية اللي هزات الرأي العام المحلي فالأيام الأخيرة، بعدما تمكنات المصالح الأمنية من توقيف جوج قاصرين كيشكو فكونهم متورطين فسرقة أجزاء ديال النحاس من فوق  برج “القمرة” التاريخي.

وحسب مصدر أمني، تقدمو القاصرين  قدّام  النيابة العامة فطنجة، و تم تحديد هوية المينور التالت لي روشيرشي.

سكان مدينة أصيلة تقلقو بعدما تعرض واحد من أهم المعالم التاريخية فالمدينة لهاد العملية ديال السرقة، عدد من نشطاء المجتمع المدني اعتبرو أن اللي وقع ماشي غير سرقة عادية، ولكن  اعتداء مباشر على التراث الثقافي والتاريخي ديال المدينة، خصوصاً وأن برج “القمرة” كيعتبر واحد من الرموز  اللي كتجسد الذاكرة التاريخية لأصيلة.

هاد البرج عندو قيمة رمزية كبيرة، حيث تم إعادة تأهيلو فالتسعينات فإطار شراكة بين مؤسسة منتدى أصيلة ومؤسسة غولبنكيان البرتغالية، وتم افتتاحو رسمياً سنة 1994 بحضور ولي العهد آنذاك محمد السادس والرئيس البرتغالي الراحل ماريو سواريس.

كما كيرتبط البرج بواحد الصفحة المهمة من التاريخ، حيث الملك البرتغالي سيباستيان الأول دوز فيه لليلة قبل ما يتوجه لمنطقة القصر الكبير، اللي عرفات سنة 1578 المعركة الشهيرة ديال معركة وادي المخازن، واللي سالات بانتصار مغربي كبير وسقوط ثلاثة الملوك.

ومازال التحقيق متواصل فهاد القضية، وسط مطالب من فعاليات محلية بتشديد الحراسة على المعالم التاريخية للمدينة، باش ما يتعاودش بحال هاد الاعتداء على التراث.