احمد الطيب – كود الرباط //

وزير الثقافة والشباب والتواصل، المهدي بنسعيد، للي البعض كيصورو بلي عندو ناس الفوق كيحميوه، قولب القصر وكذب عليهم، فاش صيفط ليهم لاليست ديال الصحفيين المعتمدين عند الوزارة والبرلمان باش يديرو تغطية خطاب بمناسبة افتتاح الدورة الأولى من السنة التشريعية الخامسة من الولاية التشريعية الحادية عشرة.

الوزير عطا لاليست ماشي كلها صحفيين مهنيين، اي كاينين اسماء معندهموش بطاقة صحافة، ومنهم لي متابعين ف قضايا فالمحاكم، وزيد جاب شي بودكاستر أو يوتوبر بينو وبين الصحافة والمهنية غير الخير والاحسان، يوتوبر كيظل يتهم بلا دليل ويسب، ولكن هاد خونا عزيز على بنسعيد حيث كيميك عليه وعمرو جبدو. وشي وحدين كيقولو بلي بيناتهم علاقات ومصالح معينة (كتبقا شبهات)

مرة أخرى، تأكد بالملموس بلي الوزير المهدي بنسعيد، وزير مكلف بقطاع التواصل للي هضر عليه خطاب سيدنا البارح، ضد الصحافة وكيشجع صحاب اليوتوب والمؤثرين ومنهم للي ساهمو ف تأزيم الوضع ونشر الثقافة السوداوية ومنهم للي كيظلو يطالبو برحيل اخنوش واسقاط الحكومة ويطالبو الملك يخرق الدستور عبر اقالة رئيس الحكومة.

سيدنا البارح قال بلي خاص تعطا عناية خاصة، لتأطير المواطنين، والتعريف بالمبادرات التي تتخذها السلطات العمومية، ومختلف القوانين والقرارات، لا سيما تلك التي تهم حقوق وحريات المواطنين، بصفة مباشرة. وهذه المسألة ليست مسؤولية الحكومة وحدها، وإنما هي مسؤولية الجميع، وفي مقدمتهم أنتم، معشر البرلمانيين، لأنكم تمثلون المواطنين. وهي أيضا مسؤولية الأحزاب السياسية والمنتخبين، في مختلف المجالس المنتخبة، وعلى جميع المستويات الترابية، إضافة إلى وسائل الإعلام، وفعاليات المجتمع المدني، وكل القوى الحية للأمة.

للي معروفين وكيحضرو، كاينين صحافيين معروفين ديما كيغطيو البرلمان بمناسبة الافتتاح ومعهم صحفيين عندهم اعتماد البرلمان وديما حاضرين فاللجان وكينقلو النقاشات والمواقف ومستجدات العمل التشريعي والرقابي للرأي العام، لكن البارح شفنا العجائب ها لي عندو شركة انتاج وفنفس الوقت يوتوبر وصحفي جامع كولشي بقا ليه غير بطاقة فنان.
حضرو كذلك اشخاص كيدعيو أنهم صحفيين، ممعروفينش الا عند وزارة بنسعيد.. عمرهم حطو رجليهم فالبرلمان وموحال واش كيفرقو بين اختصاصات المجلسين (الغرفة الأولى والغرفة الثانية) ولا اختصاصات سيدنا وعلاقتو بالحكومة وباقي السلطات.