كود الرباط//

فضيحة جديدة لوزير الثقافة والشباب والتواصل، المهدي بنسعيد، فالمعرض الدولي للكتاب للي كاين فالرباط، بحيث خرج بلاغ رسمي (منشور في صفحة الوزارة على الفايسبوك) فيه تقديم ’’صلاح الدين عبقري” كـ”كاتب عام لقطاع الثقافة”، فندوة تكريمية للوزير الراحل محمد بن عيسى، واللي حضرو فيها مسؤولين إماراتيين وشخصيات وازنة.

عبقري، فالحقيقة، ماشي كاتب عام رسمي، بل مجرد ’’كاتب عام بالنيابة” تم تكليفه بمهام الكتابة العامة بقرار داخلي من الوزير، بلا ما يدوز من المجلس الحكومي، وبلا ما يتعين رسمياً كما كينص عليه القانون.

الوثائق اللي سبق نشرتها “كود” كتكشف أن بنسعيد كلف عبقري بهاد المهمة بمذكرة داخلية بتاريخ 17 يناير 2025، بعدما فرغ المنصب بخروج سميرة المليزي اللي تعينات مديرة للمكتبة الوطنية.

عبقري هو اليد اليمنى ديال بنسعيد فكولشي تقريبا خصوصا معروف بأنه كيوقع على أغلب الصفقات، من المعرض الدولي للنشر والكتاب، حتى لمهرجانات الرباط، واللي معظمها تدار فالرباط لصالح شركات بعينها. والغريب فالأمر أن هاد السيد جا من مهمة مستشار، وطلع فسرعة الضوء لمدير مركزي، ودابا كيتقدم ككاتب عام فالمناسبات الرسمية، بلا تعيين حكومي.

فالوقت لي كاين أطر كبيرة من معاهد عليا ومدارس كبرى منهم خريجون عندهم تجارب فاليونسكو والبنك الدولي ومؤسسات ثقافية دولية، كيبقاو خارج تعيينات الوزير بنسعيد فقط لأنهم ماشي من ’’العائلة السياسية” ديالو.

وكيبقا شعار “تمكين الشباب” اللي كيروجو ليه صحاب البام ما هو إلا واجهة ديال الريع الإداري، والتعيينات حسب الولاءات، ماشي الكفاءات.