كود الرباط//

المعرض الدولي للكتاب، مبقاش عندو إشعاع، من نهار جابو وزير الثقافة والشباب والتواصل، المهدي بنسعيد، من كازا للرباط.. طبعا هنا عدمو المعرض، والشغف مبقاش وبزاف ديال المتعة للي كانت مع المعرض مبقاتش.

المعرض للي نورمالمون هو الواجهة الثقافية للبلاد، أو كيف كيقولو كيترجم مجهود الدبلوماسية الثقافية للي كيديرو الكتاب ديالنا والمسؤولين على الثقافة، تحول لـ”موكب سياسي” لإبراز “قوة ونفوذ” الوزير البامي بنسعيد. وهادشي تأكد بلي هاد المعرض جزء من الحملة الانتخابية لبنسعيد لي الحلم ديالو يجمع بين عمودية العاصمة الرباط ومنصب وزاري.

هادشي تأكد مجدد فهاد الدورة 30 للمعرض، بحيث تسابقت صفحات البام لترويج المعرض ماشي ك”محفل كيمثل المغرب” دوليا، بل كأنه معرض ملحق للبام، كيف نشرو ف صفحة إنستغرام (صورة فيها لوغو وزارة الثقافة ف اليمين ولوغو التراكتور ف اليسار بحال هوما لي منظمين المعرض). البام ركب سياسيا على هاد المعرض.

وكيف ديما بنسعيد عندو سوابق ف الركوب على المعرض، ف الدورات السابقة لي تنظمت ف الرباط، جاب المغني محمد رمضان دار به جولات. طبعا رمضان ستار وبينو وبين الثقافة مسافات طوال. كاينين نجوم عندهم إلمام بالثقافة والفكر والسياسة والآدب. وكاينين للي شعبويين وصافي واخا عندهم جمهور.

بنسعيد كيف سبق وقالتها “كود” راه يستحق يكون وزير بحقيبة كتجي معه ويستاهلها، وهي حقيبة الترفيه، ويتزاد ليها هادشي ديال الستريمات والألعاب الإلكترونية وصحاب لايفات تكتوك واليوتيب.