هناء ابو علي كود الرباط//

أعضاء ديوان الوزير بنسعيد، بلا حياء ولا حشمة، كيستعرضو فـ”VIP” بحال إلى هما المنظمين الرسميين للمهرجان، ودايرين الفنانة اللي صحابهم كأنهم فـدارهم. والصدمة؟ المسرح اللي فعلاً وزارة الثقافة مسؤولة عليه، مفيهش حتى “لاكليم”، والجمهور كيتفركع فالسخونية، وعرف تنظيم كارثي فحفل كاظم الساهر.

يعني الناس اللي خاصهم يكونو خدامين فالكواليس باش المهرجان يدوز مزيان، فضّاوها فالسيلفيات، والضحك، والعناق مع الفنانة.. أما التنظيم؟ الله يجيب.

اللي كيعرف هاد الفريق ديال بنسعيد، عارف أنهم من مدة كيتعاملو مع الصحفيين والفنانة صحابهم بحال إلى هما الحكومة الجاية، وكيبيعو لهم الوهم: “خليكم معانا، راه المستقبل ديالنا كبير”.

المفروض فأعضاء الدواوين يكون عندهم شوية ديال الوقار والمسؤولية، ولكن للأسف، وزارة الثقافة ولاّت ضيعة مفتوحة فوجه البراهش، واللي جايب صحابو يسهر، واللي جايب فنانة كضيوف شرف فـ”VIP”، واللي كيتصرف كأنه وزير صغيور وغير معلن.

وهاد الشي ماشي هو كلشي… راه جايين فضائح أخرى، فـالطريق، حول الابتزاز، التسيّب، والتبرهيش. ووقتها، غادي يبان شكون اللي فعلاً كايخدم الثقافة، وشكون اللي حوّلها لملحقة د المصالح الحزبية الضيقة.