كود -Inspirations Éco//

أكدات أمينة بنخضرة، المديرة العامة للمكتب الوطني للهيدروكربونات والمعادن (ONHYM)، أن المغرب حفر 379 بير استكشافي فمجال النفط والغاز، منها 47 بئر فالبحر و332 فالارض، هاد المعطيات جات فحوار مع مجلة Les Inspirations Éco، اللي عطات فيه نظرة على وضعية قطاع الغاز بالمغرب، ومستقبل التطوير والاستكشاف .

وبخصوص المناطق المنتجة، وضحات بنخضرة أن حوض الغرب كيبقى من أقدم وأهم المناطق اللي كتعرف إنتاج الغاز، وكيزوّد بزاف ديال الصناعات فجهة القنيطرة، خصوصاً فمجالات السيارات والورق ومواد البني، حتى حوض الصويرة مازال كيعرّف إنتاج مستقر، خصوصا من حقل مسكالة اللي كيمد معامل المكتب الشريف للفوسفاط بالغاز والمكثفات.

وعلى مستوى المشاريع المستقبلية، كيبان مشروع تندرارة فالشرق ديال المغرب واحد من الأوراش الاستراتيجية، بشراكة بين مانا إنرجي وساوند إنرجي وONHYM، واللي كيركز على إنتاج الغاز الطبيعي المسال وربط الحقل بأنبوب الغاز المغاربي-الأوروبي، كيفما شارت بنخضرة بلي بعض الأحواض، بحال لي  فدرعة فالجنوب، مازال ما متكتاشفاتش مزيان وكتبيّن مؤشرات مزيانة بفضل الدراسات الزلزالية الأخيرة.

أما بخصوص البحر، وخا كاينين اكتشافات ومؤشرات مزيانة فالساحل الأطلسي، خاصة فمناطق أغادير-طرفاية وبوجدور، فعدد الآبار البحرية مازال محدود مقارنة بالمعايير الدولية. وختمات بنخضرة بلي المغرب مازال كيجذب اهتمام شركات دولية فمجال الاستكشاف، بفضل الاستقرار، وجودة الشراكات، والتقدم المسجّل فمشروع أنبوب الغاز نيجيريا-المغرب، اللي كيتوقع يعزز الأمن الطاقي إقليمياً.