كود الرباط//

قال أديب بنبراهيم، كاتب الدولة المكلف بالإسكان، أن برنامج الدعم المباشر للسكن بدا كيعطي نتائج مشجعة على عدة مستويات، سواء من حيث عدد المستفيدين أو من حيث الأثر الاقتصادي العام.

وأكد المسؤول الحكومي، خلال جلسة عمومية بمجلس المستشارين اليوم الثلاثاء، أن البرنامج الجديد جا باش يعوض الدعم اللي كان موجه للمنعشين العقاريين، واللي ما نجحش فالإدماج الاجتماعي، عكس النظام الجديد اللي كيعطي للمواطن حرية يختار السكن اللي بغا.

وأضاف بنبراهيم أن الدعم المباشر كيوصل لـ100 ألف درهم بالنسبة للوحدات السكنية اللي ثمنها أقل من 300 ألف درهم، و70 ألف درهم للوحدات اللي كتفوت هاد الثمن. وأشار إلى أنه تم تخصيص منصة رقمية خاصة، كتمكن المواطنين من تقديم الطلب باستعمال بطاقة التعريف فقط، وكيتأكد من الأهلية ديالهم فسبعة أيام.

وأوضح كاتب الدولة أن عدد المستفيدين بلغ لحد الساعة 48 ألف، فحين تسجلو حوالي 150 ألف طلب، 90 فالمية منهم مستوفين الشروط، بكلفة إجمالية قدّرت بـ3,8 مليار درهم. وتجاوز عدد الوحدات السكنية اللي تدارو فإطار البرنامج 95 ألف وحدة، متفوق على الهدف الأولي ديال 75 ألف وحدة اللي كان مبرمج لسنة 2024.

وأضاف المتحدث أن مبيعات الإسمنت ارتفعات بـ30 فالمية، والقروض العقارية تزادت بـ2 فالمية، كما عرفات القروض الخاصة بالمنعشين العقاريين ارتفاع بـ59 فالمية.

وتابع أن 64 فالمية من المستفيدين كينتميو للطبقة المتوسطة، وهو ما كيعكس البعد الاجتماعي القوي لهذا البرنامج.