الرئيسية > آراء > بنادم وللى مدمن ديال الكليك والمتابعين والفلوس الباردة لي كتجي بالمقالب ومستاعد يبيع حياتو الخاصة بالرخى فهاد الجوطية ديال اليوتوب.. ومستاعد يبان على حقيقتو كعنصري حقير
26/11/2019 16:00 آراء

بنادم وللى مدمن ديال الكليك والمتابعين والفلوس الباردة لي كتجي بالمقالب ومستاعد يبيع حياتو الخاصة بالرخى فهاد الجوطية ديال اليوتوب.. ومستاعد يبان على حقيقتو كعنصري حقير

بنادم وللى مدمن ديال الكليك والمتابعين والفلوس الباردة لي كتجي بالمقالب ومستاعد يبيع حياتو الخاصة بالرخى فهاد الجوطية ديال اليوتوب.. ومستاعد يبان على حقيقتو كعنصري حقير

محمد سقراط-كود///

في بلاد فيها نسبة مهمة من مواطنيها دوي بشرة غامقة ومع ذلك عمرك تشوف شي واحد فيهم فالتلفازة أو فشي وظيفة كتطلب حسن المظهر فراه حنا فبلاد عنصرية، وفي بلاد لي طفل مغربي كحل في حومة شعبية كيسميو عليه البراهش قدو باكيرة ( النمر الأسود في ماوكلي) بلا ماينبهم شي واحد بلي راه كيمارسو تصرف عنصري وفيه إنتقاص من الآخر، فعادي أنه يجي نهار وتخرج لينا سارة أبو جاد بفيديو ديال مقلب عامر عنصرية إتجاه الكوحل وولادهم ، وفاللخر تخرج بتبرير عبيط ديال أن المغاربة لي مفهموش الفيديو ماشي هي لي ستعملات رضيع يالله تزاد في مقلب عنصري من أجل الكليك .

بنادم وللى مدمن ديال الكليك والمتابعين والفلوس الباردة لي كتجي بالمقالب، ومستاعد يبيع حياتو الخاصة بالرخى فهاد الجوطية ديال اليوتوب، ومستاعد يبان على حقيقتو كعنصري حقير من أجل بغيت ندير مقلب فراجل ختي باش يضحكو المتتبعين ديالي على اللون ديال ولد ختي لي الأب ديالو ماشي مغريبي، للأسف سارة أبو جاد ماشي هي اللولة أو اللخرة بزاف ديال المغاربة عنصريين وكبرو بيها وتاواحد عمرو ماقاليهم راه عنصرية هاديك بل غير ضحك، عادي تضحك من دوي الإحتياجات الخاصة وعادي تضحك على الشلح والعروبي والشمالي والداخيلي وكاع لكنوس شي كيضحك على شي ضحك عنصري وشي عامر باحكام مسبقة على شي، وكولشي كيظن بلي هو حسن من لخريين، وكيجيو الكوحل فآخر الهرم خصوصا المغاربة لي مشاركين معانا الجنسية واللغة، ولي في مناطق عديدة كتمارس عليهم عنصرية منذ قرون.

غير في النواحي ديال العرايش وريصانة كاين دواوير ديال المغاربة أصولهم من جنوب الصحراء ولحد الآن كيتزوجو غير بيناتهم واخا كاين إستثنائات طبعا، ولكن كيتمارس عليهم وعلى ولادهم نوع من الفرزيات والإقصاء في عدة مجالات، وهادشي مستقبلا كنتمنى نتخلصو منو كبلاد وكشعب، ولكن أنه يتم التطبيع معاه حتى فاليوتوب وتجي وحدة وجهها زرق بحال الكاشا ديال الحبس وحتى هي كتضحك باللون ديال الأفارقة جنوب الصحراء ووسط مصحة والفرمليات مجموعين عليها كيضحكو على اللون ديال رضيع فهادشي فات الحد وبزاف، وخاص تعامل صارم مع هاد الهراء.

موضوعات أخرى