الوالي الزاز -كود- العيون///

[email protected]

فالعيون ولفنا الوفود الأجنبية وولات زياراتهم كتجينا عادي، كيجيو يطلو على التنمية السوسيو إقتصادية وعلى وضعية حقوق الإنسان وعلى الوضع السياسي، وكيتلاقاو ناس الصحرا وممثلينهم الشرعيين لي داخلين المجال السياسي وخدامين فتنزيل التصور الملكي فأنهم يعززو هاد المنطقة ويخدموها ويزيدو بيها لقدام.

فالعيون او الداخلة طلعنا النيفو بزاف ولاو كيجيو عندنا وفود دبلوماسية ورجال أعمال ومستثمرين وووزراء سابقين وغيرو، وهادشي مزيان ويخدم الوحدة الترابية للمملكة ويكرس وجهة النظر المغربية وكيكذب گاع الإدعاءات لي كتروجها البوليساريو، ولكن فهاد الفترة شي وحدين فهاديك وزارة الخارجية هبطو النيڤو بزاااف، وولاو كيصيفطو لينا فالعيون من هبّ ودب، لي لقاوه فشي قنت كيقطعو ليه التذاكر ولوطيل فابور فالعيون ويضرب دويرة عندنا فالعيون ويمشي فحالو بلا ما تكون عندو إضافة يقدمها.

هادشي واقع دابا فالعيون لي كاينين فيها شي وحدين كيقولو بأنهم صحافيين إسبان راسلهم هداك القنصل لي فإشبيلية، ويتعلق الأمر بشي وحدين سمياتهم Juan FRANCISCO FERNANDEZ CABALLERO، كيقولو بأنه رئيس جمعية الصحافة في هويلفا، وJulian PEREZ YANEZ، مصور بوكالة EFE وثالثهم Jordi LANDERO MADROÑAL صحفي ومصور فشي گروب سميتو joly.

هاد الصفات باش تم تقديم هادو كتبين نيڤوهم الضعيف بزاف ونيڤو هداك لي راسلهم أيضا، واااالسي القنصل راه خاصك ترسل لينا شي حد عندو وزنو شي سياسي شي وزير سابق شي وزير فحكومة الأندلس واخا غير من PSOE، ما تغمقش علينا وترسل لينا صحابك لي ما عارفهم تا حد، وما عندهم ما يقدمو لينا لا ترويج ولا تسويق لهداكشي لي شافو – وحنا وهوما والزمن وطويل تا نشوفو شنو غادي ينشرو”.

إرسال هاد النوع ديال الوفود فيه بزاف ديال التخربيق والغباء، كيفاش مصور فإيفي، واش دابا باغي تقول لينا “وكالة الانباء الإسبانية” غادي دير شي روبورتاجات ولا شي تقارير على العيون، ما يمكنش وكذوب لأن مصور بوحدو ما عندو ما يدير، وثانيا “إيفي” عندها طاقم فالرباط تقدر ترسلو فأي وقت، وثالثا موقفها من الوحدة الترابية بوحدو ما عندو علاقة بموقع بموقف حكومة بيدرو سانشيث، بحيث عندها حرية تامة فالتعاطي مع نزاع الصحرا، وكل نهار كنقراو عندها تصريحات لتمثيلية البوليساريو فإسبانيا وكل نهار كنقراو عندها مواد على الصحرا لي قريبة فإطارها العام لتصور البوليساريو، وزايدون ترويجها للبوليساريو واضح وهداك شيء كيعنيها، ولكن باش تجيو وتبغيو تبيدقونا راه ما غاديش دوز علينا.

بالإضافة لذلك كاين واحد آخر سميتو Jordi LANDERO MADROÑAL، كيقدموه لينا بصفة صحفي ومصور فشي گروب سميتو joly، مع احترامنا لهاد المجموعة الإعلامية لي كتقدم راسها على أنها اول دار للنشر فالاندلس ولكن فاش كطل على المواقع لي تابعة ليها كتلاقاها كتروج للبوليساريو، غادي تقولو مزيان يجي هاد الصحافي يشوف ويطل ويبدل الفكرة، ولكن واش صحافي ولا مصور غادي يبدل خط تحرير جريدة او مجموعة إعلامية على قدها، لا وألف لا لي كيبدلها هو المجلس الإداري ولي كيقولها لإدارة التحرير، وبالتالي اذا بغيتو تجيبو شي حد جيبو شي مسؤول كبير ورفيع فمجلس الإدارة باراكة من القوالب.

حتى هداك Juan FRANCISCO FERNANDEZ CABALLERO، لي رئيس شي رابطة ديال الصحافة فهويلفا، راه بحالو بحال بحال رؤساء شي روابط عندنا فالمغرب خدمتهم معروفة. بحالو ما خصهومش يجيو للعيون للسياحة، هادشي راه داخلو التخربيق، واذا بغا شي صحافي يجي راه معروف مع من خاصو يكون، خاصو يكون مع شي حد عندو نفس صفتو بمعنى صحافي بحالو، ما يجيش هنا ويظل يدور على مركز الإستثمار ومندوبية السياحة وغيرو وساكن فاوطيل وتذاكر السفر خالصة.

وااا السي القنصل شي حد اذا بغا يخدم القضية الوطنية راه كيرسل شي حد عندو وزن باش تكون فائدة على الوطن والوحدة الترابية ويرسلهم باش نحققو نتائج من زيارتهم ماشي لي بغينا نكافئوه أو صاحبنا او خايفين منو كنرسلوه، والأحسن گاع هو بنادم يديها فراسو وفالأندلس وحكومتها لي خدامة مع البوليساريو وكتستقبلها فكل وقت ومتعاونة معاها فمجالات بزاف وفيها مجموعة تضامنية معاها وكدعمها فكل محطة سياسية.

السي القنصل بنادم هو لي يديها فخدمتو وفشغلو ويخلي عليه العيون والداخلة والصحرا، راه كاينة ناس خدامة ليل ونهار عليها وناس عاطية دمها عليها وما سمعناهمش شي نهار كيهدرو ولا كيرسلو شي حد.