سهام البارودي – كود//

فالمغرب ماشي فأفغانستان و ف2026 ماشي ف1026، و فالمدينة ماشي فالبادية، سانديك ديال عمارة باغي يمنع العيالات ياخدو القرارات الخاصة بالسكن المشترك، و قاليك آ سيدي ممنوع العيالات يهضرو و ياخدو القرارات لاكانو رجالهم حاضرين.
باش تعرف بلي الحداثة و التمدن فالمغرب كاينين غا ظاهريا، أما فالعمق بزاف د الناس عندهم العقلية ديال القرون الوسطى، كاتلقى الانسان ساكن فعمارة و فيها لاسونسور و كايستعمل الآيفون و مدخل الفيبر اوبتيك و غادي للخدمة بگرافاطة و كوستيم و لكن فلداخل ديالو هروي، عوبّي، مازال كايشوف انه الراجل الفوق و المرا لتحت و المرا ماعندهاش الحق تحل فمها لاكان الراجل كاين.

و هادشي راه هوا لي كايطرا فاش شي مجتمع كايدوز بسرعة من مجتمع تقليدي لمجتمع حديث فالمظهر، كاتبقى واحد الهوّة بين التمدن المادي و التمدن الثقافي،  عمارات كاينين و الهو سطوندينغ دار تنسيك فالاخرى و المنعشين العقاريين كايبدعو ها الاقامات بلابيسين ها الديور مجهزين بلادوموتيك الضو كايشعل بوحدو و الريدوات كايتحلو بوحدهم، طرقان، أسانسورات، ملاعب و سانديك و قوانين و لكن العقليات لي ساكنة عقليات قروسطية، بنادم تحل ليه عقلو تلقى حمار مكسّل.

و المصيبة الكحلة هي فهاد الإقامات، نسبة كبيرة ديال الديور كاتلقى المرا مساهمة فالشرا، هادشي لاماكانتش دايرة النص بالنص مع الراجل، ملي كايبغي يهز كريدي ديال الدار كايعيط على المادام، و ملي كاتوصل الطريطة ديال الدار كاتخلصها المادام، و الضريبة كاتحط فيها المادام جطها، و الما و الضو النص بالنص مع المدام هادشي لاماكانتش المدام كاضرب يديها لجيبها و تخلص كلشي و فاش كانوصلو لسانديك و القرارات ماتعيطوش على المدام !

ايوا لي بغا سيدي علي ! يبغيه بقلالشو !