وكالات//

باع مغني الراب الأمريكي كانييه ويست الفيرمة الثانية ديالو فولاية وايومنغ الأمريكية للمالكين القدامى ديالها، فصفقة وصلات لـ14 مليون دولار، فخطوة جديدة من بعد ما بدا كيتخلى على بزاف من الممتلكات ديالو.

حسب جريدة محلية سميتها “كاوبوي ستيت ديلي”، كانييه اللي عندو دابا 48 عام، باع مؤخرًا مزرعة “بيغورن ماونتن” اللي كاينة فمدينة غريبول، واللي دار الصفقة فبلاصتو مراتو بيانكا سينسوري نهار 17 شتنبر اللي فات.

هاد المزرعة كانت من قبل ديال ديفيد وبولا فليتنر، ودابا رجعات لولدهم غريج ومراتو بام فليتنر، حسب نفس الجريدة.

ما تعلنش على الثمن النهائي ديال البيع، ولكن حسب موقع Realtor.com، الثمن اللي تباعت به هو نفس الثمن اللي شراها به كانييه فـ 2019: يعني 14 مليون دولار.

المزرعة اللي كتمتد على 6.7 فدان، كاتعتبر من بين أبرز الممتلكات الفلاحية الراقية فالمنطقة، فيها منازل خشبية فخمة، أكواخ ديال الضياف، تلال خضراء، وديان عامرة بالأشجار، وحتى الحياة البرية متنوعة.

وكان كانييه سبق ودار المزرعة للبيع بـ حوالي 17 مليون دولار، ولكن فالأخير باعها باتفاق مع عائلة فليتنر. وهاد البيع جا من بعد ما عرض أول مزرعة عندو فـ وايومنغ، اللي سميتها “مونستر ليك”، للبيع فـ 2021 بـ 11 مليون دولار، ودابا مازال معروضة بثمن 12 مليون.