محمد سقراط- “كود”///
فاش كتحط صفحة “كود” صورة شي هركاوي محتل الملك العام، بزاف كيكتبوا تعليقات على شاكلة “واشفتوا غير هادو ماشفتوش ناهبي المال العام والمنتخبين الفاسدين”، للأسف صحاب هاد التعليقات مكيقراوش باغين يتلقاو المعلومة فيديو أو صورة، حيت إلى كانوا كيقراو وضربو دويرة في موقع “كود” غادي يلقاو أخبار كثيرة على الفساد وناهبي المال العام وبشكل يومي، ولكن هاد النوع كيتخايل المال العام مجموع فشي صندوق وسط الجماعة حاطينو في بيت بوحدو وكيدخلوا المسؤولين الفاسدين يهزو منو وخاص نصوروهم قيطي، بحال إلى ماعارفينش راه نهب المال العام كيدار غير أرقام، راه دوك الملايير لي تنهبات خاص تجيب رموك باش تجمعها فيهم.
هاداك المواطن الهركاوي راه هو لي صوت على ناهب المال العام وعارفوا من اللول راه غادي يخربها، ومع ذلك كيختاروا ويصوت عليه واخا الصراحة حتى الخيارات لي معاه مكتكونش مثيرة وفي بعد المرات غير مفهومة ولا تختلف عن الفائز في شيء، وخصوصا من الناحية الأخلاقية، طبعا كاين استثناءات ولكن غير لتؤكد القاعدة وصافي، دابا الناس كتختار في الانتخابات داك الخوايضي الكبير باش يتعاون معاهم في خواضهم هوما نيت، نهار يبغيو رخصة دالبني يلقاوه نهار يبغيو يهرفو على الطروطوار يلقاو معامن يدورو، هوما أصلا فاسدين وكيختاروا المنتخب الفاسد ومن بعد يدوزو سنوات كيسبو الحكومة كأنهم ماشي هوما لي صوتو عليها.
بما أن نهب المال العام مايمكنش تشدو في صورة راه كيتشد في مقالات ومواد إخبارية كثيرة، بينما الهركاوي غير المتمدن الهراف الغماق لي كيحساب ليه راسو فوق القانون وفوق الأعراف، هاداك راه هو قاعدة الفساد في البلاد والمسؤول رأس الهرم ديالها، راه القاعدة لي فيها خلل كبير ومتعايشة مع الفساد وباغاه وكتقلب عليه وكتعيشو كممارسة يومية، وعلى المواطنين الصالحين بحال قراء موقع “كود” أنهم يفضحوهم ويظهروهم للسلطة تشوفهم، وحتى إلى كانت مغمضة عليهم العين يفتحوهم ليها، باش مايبقى ليها حتى مبرر باش ماتديرش خدمتها وهذا هو دور المواطن الصالح أنه يساعد السلطة في تطبيق القانون ومنع الخروقات ومحاربة التهركاويت لي صبحات السمة الطاغية في مدن هاد البلاد.
