گود سبور//

اعترف المدير الرياضي للاتحاد البلجيكي لكرة القدم، بخسارتهم للموهبة المغربية شمس الدين طالبي لاعب كلوب بروج البلجيكي، وان المغرب تفوق عليهم وربح الرهان وكسب خدمات اللاعب مول 19 عام، اللي قرر يلعب بتوني الأسود وماشي بلجيكا.

وقال فينسنت مانيرت فحوار مع جريدة SPORZA البلجيكية على تفضيل شمس الدين طالبي اللعب للمغرب على بلجيكا، وقال: “هذا الشي كان متوقع، وكانت المؤشرات سلبية اشهر هادي، ولاحظت ان التفاعل كان سلبي من شمس الدين طالبي والمحيط ديالو ملي بديت الخدمة فديسمبر الماضي”.

وكمل المسؤول البلجيكي، وقال: “طالبي حس ان التواصل معه كان ضعيف بزاف ملي تعرض للاصابة الخطيرة فالركبة، راه بقى فيه الحال حيث حتى شي حد من الاتحاد البلجيكي ما سول فيه ولا عيط له، وحاولت نرجع الثقة ديالو ولكن هذا الشي ما كانش كافي باش يختار بلجيكا”.

وكان عبد الله طالبي، والد شمس الدين طالبي كشف فتصريح له لجريدة “Nieuwsblad” البلجيكية، ان العلاقة بين ولدو والاتحاد البلجيكي لكرة القدم تهرست، وهذا الشي حيث اللاعب توعت وتقطعو له ليگامون وحتى حد من الاتحاد البلجيكي ما تواصل معه باش يسول فيه ويطمن على الحالة الصحية ديالو، واخا لعب مع الفئات السنية فالمنتخبات البلجيكية، وبالمقابل فالجامعة الملكية المغربية لكرة القدم، والمسؤولين ديالها كانوا ديما فتواصل مع اللاعب ملي كان صغير وكانوا كايسولو فيه ملي توعت وعرضو عليه يجي للمغرب ويتكلفو بمصاريف الرحلة.