كود الرباط//

علمت “كود” من مصدر استقلالي، أن عدد من مفتشي حزب الاستقلال كيتاصلو بأعضاء المجلس الوطني المنتخبين فالمؤتمر الأخير، باش يعطيوهم بطائق التعريف الوطنية، استعدادا لدورة المجلس الوطني المقبل المخصصة لانتخاب أعضاء اللجنة التنفيذية.

وصرح قيادي بارز لـ”كود” بلي مزال مكاينش التوافق ولا الحسم فلاليست ديال القيادة للي غادي تشد بزمام الأمور من هنا لـ2026.

تحدي كبير كيتسنا حزب الاستقلال، وسط صراعات قوية بين التيارات داخل الحزب، خصوصا تيار حمدي وتيار نزار بركة، هاد التحدي فرض بلوكاج تنظيمي ولكن بعمق سياسي بين هاد جوج التيارات اللي كل واحد عندو تصور لطبيعة القيادة المقبلة وكيفاش خص الحزب يدخل الانتخابات المقبلة.

دبا كيبقا اللجوء إلى التصويت، الخيار الصعب أمام نزار بركة، خصوصا وفي حالة جاب لاليست وتم رفضها من طرف أغلبية أعضاء المجلس الوطني، هنا غايكون نزار أمين عام ولكن “بدون لجنة تنفيذية” من الأغلبية.

قرب دبا يكمل شهر على المفاوضات على تشكيل اللجنة التنفيذية، ولكن بلا نتيجة، بلوكاج كبير كيواجه نزار بركة، فالوقت لي نجح الحليف ديالو حزب الأصالة والمعاصرة فإخراج لاليست ديال المكتب السياسي وبعد منها الأسماء المشبوهة والأعيان والنافذين بحال العربي المحرشي ومحمد الحموتي، قطبي الشمال والريف.

بركة وحمدي خصهم يختارو الأعضاء الـ30 من أصل 107 ترشيحات تلقتها اللجنة التحضيرية للمؤتمر الوطني الثامن، وذلك قبل التعديل الحكومي المرتقب.