كود سبور//

كشف عبد السلام بلقشور رئيس العصبة الوطنية لكرة القدم الاحترافية، أن ميزانية الرجا والوداد الرياضيين هي الكبيرة فالمغرب، بحوالي 10 دالمليار سنتيم فالعام، وعاد كايجيو من وراهم الجيش الملكي ونهضة بركان بحوالي نص ميزانيات الرجا والوداد، ومن بعد كايجيو باقي الفرق، ووضح أن الفريقين الأخضر والأحمر عندهم مشاكل ديال كثرة الانتدابات وعدم التعامل مع النزاعات بشكل جيد وهذا الشي اللي مغرقهم، وبالمقابل كشف على مصادر مداخيل فريق الجيش الملكي ونهضة بركان وقال إنها ماشي من مؤسسات عمومية، وقال إن مداخيلهم قل بالنص من الرجا والوداد.

وبخصوص تأثير إغلاق الملاعب ماديا على الرجا والوداد، قال عبد السلام بلقشور: “نفس الأمر مع نادي الجيش الملكي، اللي ما خالقش لنا متاعب او مشاكل فهاد الباب، على اعتبار أن الميزانية ديالو مستقرة، وميزانية عادية جدا وما عندوش نزاعات وما عندوش مشاكل، وكانتمناو أن جميع الأندية تكون مستقرة بحال نادي الجيش الملكي، اللي كايتمتع بواحد الحكامة كبيرة وكنهني المسيرين ديالو على الاستقرار اللي كايتمتعو به، الاستقرار المالي والإداري رغم أن أرقامهم عادية وعادية، وقد تكون لا تمثل إلا 50% من ميزانية الرجا والوداد وإلى بغيتو نكشفو على ميزانيات جميع الأندية نكشفو عليها”.

وزاد وضح بلقشور بخصوص مداخيل الجيش الملكي: “الجيش الملكي فريق ما عندوش المؤسسات العمومية، وهاديك راه جمعية ديال الأعمال الاجتماعية، وحتى هي عندها مداخيل عادية وعادية جدا تتجاوز نسبيا 5 المليار سنتيم، وما عندهمش نزاعات، وراه مربط الفرس في مشاكل الأندية هي كثرة الانتدابات والنزاعات اللي غرقتهم، فالميزانيات الكبرى للأندية فالمغرب هي ديال الرجا والوداد، وتابعينهم الجيش الملكي ونهضة بركان، ومن بعد منها الفتح الرباطي، وكاينين ميزانيات متوسطة جدا ديال الدفاع الحسني الجديدي وأولمبيك آسفي والمغرب التطواني وكاينين ميزانيات ديال ما دون 20 مليون درهم ديال الزمامرة وشباب السوالم”.

وبالنسبة لميزانيات الرجا والوداد والمشاكل ديالهم، قال بلقشور: “عندهم معدل ديال 10 المليار ديال المداخيل في السنة لكل فريق، من الإشهار والجمهور والجهات المانحة والمجالس المنتخبة والدعم ديال الجامعة الملكية المغربية لكرة القدم والعصبة الوطني لكرة القدم الاحترافية، فكيفاش هذه المبالغ ما كتنعكسش على الوضعية ديالها؟ لأن هناك مشاكل تتعلق بالنزاعات اللي قهرت الأندية الكبرى بالمغرب، والتدبير ديالها غير المحكم من الناحية القانونية هو الحلقة الأضعف فالتسيير ديال الاندية الكبرى، وهذا الشي اللي قهرها، لو كان غير الحكامة الجيدة ديال الانتدابات وديال النزاعات وأداء الأحكام ما كانتش هذه الأندية تعاني نهائيا، راه الرجا فالـ5 سنوات الأخيرة تجاوزات 80 انتداب والوداد 92 انتداب، وكثرة الانتدابات تنتهي بفسخ العقود من طرف واحد، وهذا الشي يؤدي إلى النزاعات، والأندية اللي ما عندهاش نزاعات ما عندهاش مشاكل مادية”.

أما بخصوص نهضة بركان وموضوع المداخل ديالو اللي خالق جدل كبير، وضح بلقشور: “الوضعية المالية لفريق نهضة بركان وخلافا لكل ما يروج، فهي موارد مالية عادية وعادية جدا والميزانية العامة قد لا تصل إلى 50 مليون درهم، يعني 5 المليار سنتيم، وغانجزأها ببساطة وموضوعية وواضحة وباينة، بحيث أن نهضة بركان احترفوا فكأس الكاف وكايجيبو منو بين مليار و2 د المليار فالعام بسهولة، راه كايشاركو تقريبا كل سنة ومايمشي للفينال وشي مرات كايربحو اللقب، راه لعبو 4 الفينالات ربحو 2، ونهائي السوبر الافريقي والقليلة كايجيبو واحد المليار فالعام من افريقيا، ومن خارج المالية ديال الجامعة والعصبة والمجالس المنتخبة بالإضافة إلى احتلالهم المراكز الثلاث او الرابعة فالبطولة بالاضافة إلى الفوز بكاس العرش، بالتالي كاتكون عندهم منحة ديال الترتيب ومنحة كاس العرش إلى ربحوه وعندهم 600 مليون بحال الجميع من الجامعة، ملي كاتجمع هذا الشي كايعطيوك واحد 2 المليار ونص كمداخيل من هذا الشي”.

وكمل بلقشور وزاد وضح: “نهضة بركان عندهم أيضا المستشهرين ديالهم واللي هما ولاد منطقة بركان معروفين في مجال المال والأعمال، وعائلة كبيرة معروفة على الصعيد الوطني وكاينة فالشرق وحتى فالدار البيضاء وكايعطفو على النهضة البركانية، وهذاك الإشهار اللي كاين فالتيران كايدخل لهم بين 3 و4 المليون ديال الدرهم وبحالهم بحال باقي الأندية كياخدو منحة من المجلس الإقليمي ومنحة من مجلس الجهة ومنحة من مجلس المدينة، رغم أن مجموع هذه المداخلين يقل كثيرا عن مدخول مدن اخرى بحال مثلا أكادير، فمجلس جهة أكادير كايعطي للحسنية مليار في حين أن مجلس جهة الشرق كايعطي 350 مليون لبركان، راه نهضة بركان تصور بشكل مستهدف اعتقد ولا بشي صورة غير حقيقية وغير معقولة تماما، وحنا مستعدين نبينو مداخيل الأندية للشفافية، المهم هذا الشي كامل كايوصل نهضة بركان لـ5 المليار”.

وكمل بلقشور: “اللي مؤكد هو ان النهضة البركانية ما كاتستفدش من المال العام، وما عندهاش مؤسسات عمومية ديال الدولة، ولكن ما غانمنعوش شركة خاصة او شي واحد عندو انتماء لبركان يعطف على النادي وهذا الباب مفتوح لجميع الاندية، وراه كاينة اندية اللي عندها مؤسسات عمومية كاتدعمها، راه الميزانية ديال بركان نص الميزانية ديال الوداد، وميزانية الرجا كاتكون ديما قل من الوداد، تقريبا ناقصة بواحد المليار ولا مليار ونص إلا فالعام اللي ربحو الرجا مجموعة من الالقاب منها كاس العرب وكاس الكاف وكانت عملية بيع عدد من اللاعبين وكانت عندهم مداخيل استثنائية، وحتى نهضة بركان كانوا باعوا عقد ايوب الكعبي بشي 5 المليار، وبركان عندهمش نزاعات، وراه عندهم 47 انتداب في مدة 5 سنوات بالمقابل الرجا عندهم كثر من 80 انتداب والوداد كثر من 90 في نفس المدة.