كود سبور//

كشف عبد السلام بلقشور رئيس العصبة الوطنية لكرة القدم الاحترافية، أن الدعم اللي كايعطيه مجلس مدينة الدار البيضاء للرجا والوداد قليل بزاف، مقارنة مع داكشي اللي خاص ياخدوه الفريقين حسب ما كايشوف هو، ودعا المجلس إلى دعم الناديين ماليا حيث الفلوس كاينة، وخاصو يعاون الفريقين باش يخرجو من الأزمة اللي عايشينها، على اعتبار أن الناديين هما القاطرة ديال الكورة المغربية ومروجين اسم الدار البيضاء أفريقياً وعالميا.

وخلال المرور ديالو على قناة الرياضية، انتقد عبد السلام بلقشور مجلس مدينة الدارالبيضاء، وقال: “مبلغ 500 مليون سنتيم اللي كايعطيها المجلس للرجا وللوداد ماشي حتى 1% من الميزانية ديال المجلس السنوية، راه مجلس كازا اللي هو أكبر المجالس المنتخبة فالمغرب، عندو ميزانية ديال 500 مليار سنتيم فالعام، كايعطي منها للرجا 500 مليون سنتيم وللوداد 500 مليون سنتيم، وأن هذا الشي ما شي معقول”.

وأكد بلقشور: “الرجا والوداد كايروجو لاسم الدار البيضاء قاريا وعالميا، راه خاصو يعطيهم على الأقل 30 مليون ديال الدرهم كدعم مالي باش يبقاو الفريقين قاطرة ديال الكورة المغربية والدعم الأول خاص يكون من مجلس الدار البيضاء، وهذا نداء للمجلس ديال كازا باش يدعم الفريقين”.