كود سبور//

قرر رئيس العصبة الوطنية لكرة القدم الاحترافية، عبد السلام بلقشور الترشح لرئاسة الرجاء الرياضي، خلال المرحلة المقبلة، وهو الخبر اللي كان نشرو جورنال “گود” قبل مدة.

وكشفت مصادر رجاوية لجورنال “گود”، أن بلقشور بدا بالفعل المشاورات مع منخرطين فالرجا، وعيط لهم باش يعرض عليهم لاجتماع يشرح لهم فيه المشروع ديالو فالنادي بالتفاصيل وشنو الأهداف ديالو، ومن بعدها يقاد لائحة يترشح بها للجمع العام، وهو الجمع العام اللي كايطالبو الرجاويين الرئيس المؤقت الحالي عبد الله ببرواين والمكتب ديالو يعلنو عليه لانتخاب رئيس جديد، باش يكون عندو الوقت فين يصلح الأمور فالنادي والفريق الأول، ما حد الموسم يالاه سالا ويوجد للموسم الجاي، ومايبقاوش يضيعو الوقت.

نفس المصادر وضحت أن المشروع اللي غايترشح به عبد السلام بلقشور، لرئاسة الرجا مشروع صحيح وقوي وعندو دعم من الدولة والمؤسسات الوصية ومن الجامعة الملكية المغربية لكرة القدم، لهيكلة النادي وإصلاح الأسس ديالو وتثبيت قواعد الاحتراف والحكامة داخل الرجا رياضيا وتسييريا، مع تحليل أخطاء الماضي والهفوات وسوء التدبير ووضع قطيعة مع العشوائية، وإعادة الثقة للمستثمرين فمؤسسة الرجاء الرياضي، والانفتاح على مستثمرين عندهم قدرة مالية على منح الموارد للنادي وجلبهم، والهدف هو الرجا يرجع ينافس بقوة محليا وإفريقيا ويحصد الألقاب.

ووضحت نفس المصادر، أن هذا المشروع داخل فيه الجمهور كفاعل أساسي باش ينجح، على اعتبار أن جمهور الرجا هو راس مال النادي، وأضافت أن بلقشور ناوي يدافع كرئيس للرجا على الجماهير في إطار القانون ويصالح مكونات النادي مع بعضها البعض، والأكثر من هذا باغي يخلق مصالحة بين جمهور الرجا وحتى الجماهير الأخرى، وتجاوز التشنج فالعلاقات بين الرجاويين وباقي مشجعي الأندية الأخرى وهي علاقات زادت خسرت فالسنوات الماضية، وهذا الشي راه غايكون سابقة فمشروع مرشح لرئاسة نادي بالمغرب، وأيضاً باغي بلقشور يصالح الرجا مع المؤسسات بعدما ساءت العلاقة بين النادي مع عدد من المؤسسات خلال السنوات الأخيرة.

ومن فوق كل هذا، أكدت المصادر أن الرجاء الرياضي ومع مشروع عبد السلام بلقشور، غايكون نموذج لباقي الأندية الوطنية باش تمشي عليه، وأن انخراط الرجاويين فالنجاح ديال هذا المشروع راه غايساهم فتطوير الكورة الوطنية وماشي غير النادي ديالهم، على اعتبار أنه غايكون “مشروع بيلوط” باش تمشي عليه الأندية الأخرى، سعيا من المسؤولين ديال الكورة فالمغرب لتطوير أسس الاندية المغربية وتفعيل الاحتراف وتطبيقو على ارض الواقع، وما يبقاش غير مجرد شعارات عند المرشحين لرئاسة هاد الأندية وملي كايطلعو للرئاسة كايبقاو عاطينها غير للعشوائية وسوء التدبير او يستعملو الفرق باش يقديو مصالحهم، وبالتالي فالرجا بهذا المشروع غايكون القاطرة اللي غاتجر باقي أندية البطولة المغربية نحو الاحتراف، وباش تواكب هذه الأندية التطور والنجاحات اللي كاتحصدها المنتخبات الوطنية فگاع الفئات السنية، وغايكونو الرجا هما الموديل، وأن الوقت جا باش الفرق تخرج من الهواية وتواكب سرعة التطور اللي غادي به المغرب المقبل على تنظيم كاس إفريقيا فديسمبر 2025، وكاس العالم 2030.